掃呢頁CODE去手機

2015年11月19日 星期四

Letv、 myTV大敵  PCCW專攻韓劇迷 [壹週刊 - 1341 - 生活] M1,

壹科林 Letv、 myTV大敵  PCCW專攻韓劇迷 PCCW搞免費電視台 Viu TV,雖然要等到明年四月先有得睇,不過最近率先推出手機 app Viu試水溫。無本地節目、新聞,重點放在日、韓、台劇上,主打串流煲劇市場。相比現時比較多人用的 Letv同 myTV,作為新仔的 Viu,若然無賣點,實在好難殺出重圍。其 ...


壹科林

Letv、 myTV大敵  PCCW專攻韓劇迷

PCCW搞免費電視台 Viu TV,雖然要等到明年四月先有得睇,不過最近率先推出手機 app Viu試水溫。

無本地節目、新聞,重點放在日、韓、台劇上,主打串流煲劇市場。

相比現時比較多人用的 Letv同 myTV,作為新仔的 Viu,若然無賣點,實在好難殺出重圍。

其中「必殺技」包括八小時追劇、自家製韓粉節目等。

相比其他兩個 apps,有無勝算?即睇。

片庫有幾大?  Viu勝

齋計片庫數目,自不能單計影片數目,仲要睇埋影片有無吸引力,否則若然計本地「膠」劇,必數 myTV最多;國內倒模劇就以 Letv佔優,不過香港觀眾未必受落。以現時最多人睇的韓劇作為比較,三個 apps都各有不同,其中 myTV有 26套,而 Letv則有 50套,至於最多韓劇數目的,竟然是較新的 Viu,總共有 55套,實在令人喜出望外。

myTV以橫向顯示方式搵劇,一頁最多顯示到三套,掃到手指都甩皮。

Letv介面以一頁六格顯示,搵劇都算方便。

除一般的韓劇頻道外, Viu仲有獨家追播,韓國播出後約八小時就有得睇。

支援平台幾多個? 平局

講到手機睇片,當然要支援不同的手機平台。其中「歷史」較長的 myTV同 Letv,已經全面支援手機三大平台,包括 Android、 iOS及 Windows Phone,另外亦有電腦軟件睇片。就算最新的 Viu,亦都支援 Android及 iOS,亦可經瀏覽器在電腦睇,其實都已經好齊全。

myTV不設下載功能,不過勝在聲道及字幕語言都有兩個選擇,是三個 apps之中最多。

本地串流播片 apps好多都無下載功能,但 Viu竟然有,抵讚。

廣告量多少?  Letv、 Viu勝

Viu另一個比較特別的功能,是每集都有相關附加資料,解釋內容,睇得更投入。

睇片,最怕睇一陣又賣廣告,等餐死,同網絡塞車「窒窒吓」一樣討厭。而在三個串流播片 apps之中,最多廣告的就是 myTV,一開 app就已經送你全屏幕廣告,而每次去到選集數頁面又有,再入埋去睇劇,仲要分節賣廣告……廣告多到數唔到。至於 Letv同 Viu,只會在播片之前有個約 30秒的廣告,之後就可以由頭睇到尾,爽得多。

畫質選擇有幾多? 平局

潮興大屏幕手機,好多用家用作煲劇專機,屏幕愈大,要求畫質亦愈高,否則播片時「一格又一格」。現時三個 apps最高支援的影片解像度為 720p,當中畫質最好的是 myTV、其次是 Viu、第三是 Letv,相信最大原因是所使用的解碼方式不同,令畫質有輕微差異。

三個 apps均提供 720p解像度影片,質素算不錯,但記得睇住流動數據做人。

Letv雖有 1080p及 4K解像度提供,但只限電視才能觀看。

總結:新 app有前途

論睇片的方便程度,首選較少廣告的 Letv同 Viu,使用較方便。

但 Letv始終源自國內,大部分片源只得簡體中文字幕,想睇繁體字幕,就要揀 Viu。

而且韓劇數目夠多,俾多些少時間,肯定有前途。

撰文:蘆甘

攝影:關永浩

features@nextmedia.com

鍾意就快D Share啦!