正積極籌備婚禮的阿正，上週四（十二日）孖未婚妻在中環 De Beers專門店揀婚戒。
娛樂偵訊
RB阿正陪未婚妻 名店揀婚戒
生得高大樣似任賢齊的 RubberBand隊長兼結他手阿正（馮庭正），離婚後與馬來西亞小姐冠軍尚羚（ Sherine原名黃淑玲）擦出愛火，拍拖三年，今年初，阿正於瑞士海拔 3,103米的雪山上，跪低向女友求婚，掂咗！
上週四（ 11月 12日），本刊發現春風滿面的阿正，陪住未婚妻在中環一間鑽飾店揀婚戒，好事近！
一拍即合
離過婚，育有一女一子的 RB隊長兼結他手阿正，父親是低調億萬富豪馮熾均，屋企好有米！一二年，他與翻唱 RB作品的馬來西亞小姐冠軍黃淑玲（現易名尚羚）一拍即合，在男友影響下， Sherine去年投 DJ Tommy旗下做「農夫」師妹，由模特兒轉戰歌手。
「雖然離咗婚，但阿正仲好照顧同前妻所生對仔女，初初同 Sherine一齊因為離婚驚人說三道四，所以佢哋拍拖都好低調，到後來感情穩定，對仔女同女友又相處到，阿正亦改變咗好多，以前佢好靜好 cool，而家多嘢講咗又識得照顧身邊朋友，仲會跟女友學瑜伽，成個人唔同晒！」阿正身邊好友透露。
三千米求婚
今年三月，二人拍拖到瑞士滑雪朝聖，阿正更於海拔三千一百多米高的 Matterhon山峰上，在瑞士國犬「聖伯納」（ St. Bernard）見證下，正式向 Sherine跪地求婚！
「佢哋一直都有結婚嘅 planning，但身邊啲朋友無諗過阿正咁浪漫喺雪山求婚囉！佢話一早安排咗，喺呢個 trip度俾 Sherine一個驚喜！」
簡單款為主
求婚成功後，二人開始積極籌備婚禮。上週四（十一月十二日）下午三點，本刊發現阿正和手上戴住求婚鑽戒的 Sherine，在中環 De Beers專門店試婚戒，在飾櫃前坐低，店員拿出不同款式的婚戒讓兩人選擇。
其間，除了試戴式樣較簡單的情侶款婚戒外，阿正又細心地幫未婚妻試戴上手，預演交換婚戒。
撰文、攝影、攝錄：娛樂組
|
鍾意就快D Share啦！
|
|
|
