娛樂偵訊
投資輸身家 韋家雄翻身
週日舉行的無綫頒獎禮， 50歲韋家雄憑《梟雄》奪「最佳男配角」，成為當晚獲最多掌聲喝采聲的得獎者，盡得人心。在大台二十年，一直被派演傻呆角色的他，一度意興闌珊轉做生意，先遇上「沙士」蝕入肉，繼而拍檔劈炮走埋。
韋家雄未有放棄，近年再開製作公司替荷李活動畫做後期，靠黃秋生一句提點，練就了二十年功力，終於被肯定，連環中獎。
秋生篤爆交行貨
韋家雄致謝詞時，第一時間公開多謝黃秋生「點醒」，事緣去年拍《梟雄》時，開工第一日，已經被對方篤爆，指他有潛力卻交行貨。
「當其時家雄喺有啲意氣消沉，因為做咗咁耐，大部分角色都係做傻仔，佢覺得《梟雄》個角色都係咁上下，所以冇乜心機。秋生同佢做完第一場戲，就話佢冇火，無理由交呢啲戲，做到收收埋埋，叫佢攞番團火出嚟，秋生認為喺大佬身邊嘅跟班，冇可能傻傻呆呆嘅。」一名劇組工作人員說。
黃秋生肯過招，韋家雄即時反省，開始投入角色，結果揮低大熱揚明、王浩信，跟同劇的黃秋生一齊攞獎。
「家雄份人唔識爭取，好似大哥韋家輝同杜琪峯合作咁多年，身邊人見佢捱得咁辛苦，都叫佢搵自己阿哥幫吓，不過佢聽完就算，從來冇開過口。今次攞獎，平日 cool爆嘅韋家輝都有短訊恭喜佢，仲叫家雄出年攞埋視帝。」韋家雄身邊人說。
處男執導
韋家三兄弟妹都食娛圈飯，胞兄韋家輝是神級編劇，細妹韋家華在有線做編導，其貌不揚的韋家雄，堅持做幕前，磨劍二十多年，已決定明年處男下海，做導演。
「佢儲埋好多自己嘅古仔，好想自己做導演，而家已經準備緊。」在無綫兩個十年，九八年在《真情》飾演「大力」，跟同樣要扮傻呆的苑瓊丹擦出火花獲好評，但無以為繼，長期做三、四線角色。事業停滯不前，韋家雄曾經一隻腳踏出娛圈，跟朋友合作做生意。
開製作公司
○三年搞過網上商場，比阿里巴巴的淘寶早十年！可惜撞正「沙士」市道差，加上伺服器損毀，做了一年，蝕六位數字離場。
「家雄都未死心，五年後儲到一筆錢，又同日本人夾份搞 LED生意，○八年 IFC倒數嘅燈飾，之後仲有上海博覽會 LV場館外牆，都係佢間公司作品，不過一一年日本海嘯，個拍檔突然唔玩，最終都係結束收場。」
屢敗屢戰！早前韋家雄再跟友人合資開製作公司，並接下多部荷李活動畫的後期製作。
「佢唔鍾意爭，但係個不斷搵路行嘅人，跌低又可以再起身，廿年來都係咁。今次攞獎，證明佢冇錯！」韋家雄身邊人說。
韋家雄開製作公司，近年參與製作過的電影及短片後期，其中《走佬芝娃娃》係荷李活片。
韋家輝：我都等咗好耐！
見住細佬起跌的韋家輝，在韋家雄得獎當晚，第一時間恭喜對方，對他有今日，韋家輝坦言十分欣慰。「佢係靠自己努力攞到今日成績，做咗咁多年，有時做哥哥嘅都替佢心急，希望佢出人頭地，我唔想因為自己係監製或者導演，夾硬要用佢幫佢。咁耐佢純粹靠自己，等到而家，開始有成績。不過人生有起跌都係好事，演員係藝術家，藝術家有生活體驗好重要。」
慣性忽視
無綫捧人，聽話肯簽長約優先，不少有實力的演員，因而被埋沒和忽視，直至近年網民狂插，無綫才作出微調，令實力派有抬頭機會。
撰文、攝影、攝錄：娛樂組
|
鍾意就快D Share啦！
|
|
|