周柏豪強戰勁歌王張敬軒冧莊有難度
《勁歌金曲頒獎典禮》將於本周日舉行，天后容祖兒在零對手下第11度奪「最受歡迎女歌星」，反觀「最受歡迎男歌星」則鬥爭激烈，男神周柏豪做「程咬金」，勢阻上屆首奪「男歌星」獎的張敬軒冧莊！
無綫《勁歌金曲頒獎典禮》今年提早在十二月舉行，成為2015年的第一張樂壇成績表。年初首度奪「最受歡迎男歌星」的張敬軒，傳其英皇唱片公司今次亦不容有失，出力為他冧莊，連同祖兒的「女歌星」獎，希望再次創出橫掃男女歌星獎的佳績。
兩唱片公司角力
另邊廂，華納對旗下男神周柏豪亦奮力爭奪首得「男歌星」獎，成就柏豪在首張成績表「攞頭彩」造勢。頒獎禮舉行在即，兩間唱片公司都互相角力。有傳英皇向無綫打出「友情牌」，加上軒仔唱功和實力應該冇得輸。至於華納見和無綫首度「和好如初」，覺得無綫亦應該釋出誠意「厚待」柏豪。其實回顧今年度《勁歌金曲》優秀選第一回及第二回的得獎歌曲名單，軒仔和柏豪各有兩首歌得獎，可謂年頭鬥到年尾，爭得你死我活。
對於軒仔奪「男歌星」獎信心，英皇唱片科總監張生表示：「信心梗係大，憑軒仔樂壇資歷同成績都好好，香港有好多歌迷鍾意佢。（聽聞男歌星獎華納都爭得好犀利。）係咩？講真大家都會幫自己公司歌手爭取最好成績，呢啲各有各做啦。正如軒仔咁得，公司唔使做嘢咩？呢啲公平競爭。（軒仔好緊張？）我哋就唔緊張，因為好有信心，但突如其來有奇怪嘅嘢發生就意料之外，總之軒仔攞獎係實至名歸。」
至於華納董事總經理Gordon力撐柏豪：「強壯！因為柏豪成績有目共睹，紅館開演唱會，喺內地、澳門都開騷，人氣爆晒燈，唱片成績亦非常好。（同軒仔爭男歌星？）有競爭係好事，有話題先可以令樂壇炒得更熱。」
吳若希奪金曲金
軒仔和柏豪為「男歌星」獎爭崩頭，女歌手則繼續由祖兒獨領風騷，將第11度奪「最受歡迎女歌星」獎。據知主要對手楊千嬅和謝安琪（Kay）都不會出席《勁歌》頒獎禮，皆因無候選歌入選，就算有歌入圍的鄧麗欣亦不出席。至於Kay在《勁歌》「自動消失」，有傳因上屆以為Kay憑《獨家村》大有機會奪「金曲金獎」，沒料竟敗給吳若希的《越難越愛》，隨即傳出與無綫關係「冰封」，所以今年Kay與麥浚龍熱爆的合唱歌《羅生門》都可以冇份入圍候選歌曲。
至於儼如無綫掌上明珠的吳若希，有傳繼無綫台慶頒獎禮後，再度憑《眼淚的秘密》冧莊奪「金曲金獎」，但亦有知情者指仍存變數，有機會汪明荃的《華麗轉身》來個終極得勝。然而20首「勁歌金曲獎」當中，「親生仔女」許廷鏗和鍾嘉欣都各佔兩首，還有祖兒、張敬軒、周柏豪、吳若希、鄭俊弘、吳業坤、汪明荃、泳兒、林奕匡、洪卓立、胡鴻鈞、連詩雅、羅力威、王梓軒與陳奐仁等分佔獎項。
另外，吳若希昨日出席活動，對於在台慶頒獎禮被指用「那些年」暗寸汪明荃，她解釋謂：「我意思係今年有兩首鍾意嘅歌，一首係阿姐嘅「經過那些年」（歌名《華麗傳身》，一首係嘉欣嘅《一顆不變心》。」
文：音樂組
|
鍾意就快D Share啦！
|
|
|