熱爆娛樂: 吳業坤掂咗　龔嘉欣生日放期陪食早餐 [壹週刊 - 1345] _

2015年12月17日星期四

吳業坤掂咗　龔嘉欣生日放期陪食早餐 [壹週刊 - 1345] __,吳業坤,鍾嘉欣,嘉欣,李嘉欣,龔嘉欣,M1,

12月 5日朝早九點半，記者發現龔嘉欣和吳業坤偷偷在將軍澳 PopCorn商場撐枱腳，當發覺有人行近，嘉欣即停食望鏡頭。

娛樂偵訊

吳業坤掂咗　龔嘉欣生日放期陪食早餐

出道五年，天生一副毒男樣的吳業坤（坤哥），今年竟然打入商台的叱咤頒獎禮「我最喜愛男歌手」最後五強，越級挑戰陳奕迅。

唔聲唔聲，嚇你一驚！原來坤哥仲有把氹女油嘴，明知龔嘉欣唔吼，照死纏扮矮仔隨傳隨到，最終成功攝期，陪女神食生日早餐。

晨早送上門

在新版《愛•回家》中，吳業坤飾演龔嘉欣細佬，近水樓台，早已𥄫中對手的坤哥，隨即大獻殷勤。

「嘉欣心裡有數，知坤哥好冧自己，不過佢一向都鍾意高大靚仔，坤哥明知唔係嘉欣杯茶，但就繼續扮傻，又做外賣仔隨傳隨到，嘉欣要搵人幫，佢總係第一個舉手先。有時佢明明收咗工，又詐詐帝帝等埋『家姐』，扮晒想黐車坐，實則係點，大家明。」知情人透露。

成功在嘗試！十二月五日，龔嘉欣二十六歲生日當天早上九點半，記者發現坤哥陪龔嘉欣，到她將軍澳寓所附近的商場一起食早餐。二人刻意坐埋餐廳一角，坤哥用外套帽笠頭，壽星女大部分時間亦耷低頭，全程細細聲密斟。據了解，當日兩人都有通告，要返電視城開廠景，坤哥花了不少心機，終於攝到女神的早餐期。

二人之後扮打電話，擰歪面避鏡頭。

龔嘉欣敏感度相當高，發現鏡頭後，索性擰轉頭望實記者。

約家姐去華星冰室食早餐，坤哥為冧嘉欣，更在 ig開名叫股東之一的蔚雨芯出來招呼，展現雄風一面。

扮被飛搏同情

「坤哥面皮厚唔知醜，仲識得扮可憐，周圍同人講自己成日俾女飛，搞到大家都唔會踩盡佢，雖然佢經常用呢招，但又 work喎。」

外表看似毫無殺傷力的吳業坤，推出處男碟不久，已揮低許志安、李克勤，打入商台叱咤「我最喜愛男歌手」最後五強，於短時間內成為網絡紅人，歌曲《原來他不夠愛我》的 MV，以超過三百四十多萬點擊，力壓周柏豪。

微博露餡

坤哥與龔嘉欣合作拍處境劇，他借勢親近，不時上載二人密照，讓人葡萄。

二人合照也拉拉扯扯，似姊弟關係嗎？

近日《愛•回家》拍到龔嘉欣和張振朗拍拖戲份，但坤哥不時留守到二人拍完，再一齊收工。試過有一次坤哥沒有戲份，也專程返廠陪「家姐開工」。

機會主義者

氹女叻，氹人一樣掂！據了解，吳業坤會親自行台，去勻商台港台，周圍向人介紹自己，有次他買埋一大包《魔法奇緣》糖做手信，送俾啲 DJ；其實當時大家都好愕然，但亦因此攞到不少印象分，大家覺得他有童真。

「坤哥好有部署，亦識得雙邊投注，『碼』得 YouTuber小花（ Hannah）好實，佢同小花都係參加歌唱比賽入行，大家識咗好幾年，見小花喺 YouTube紅咗，坤哥就同佢行得好埋。早排小花有份拍《網絡挑機》，佢唔收錢幫手出鏡一齊 jam歌，又喺鏡頭前讚對方靚，好識把握眼前機會。」知情人說。