娛樂偵訊
後會有琪
佩服謝安琪（ Kay）的灑脫。
在上位事業與家庭之間，她毫不猶豫選擇了後者。
十年，辛辛苦苦披荊斬棘，開山劈石，才有今日登上女神寶座的成績，正在步入收成期的她，卻再一次暫別樂壇，回到她最重視的家庭崗位，重新出發，尋找另一個謝安琪。
準備退下火線， 16• 4，晚上 10時 45分，暫別個唱尾聲，站在用行李篋布置的舞台上唱《山林道》，現場觀眾不願放手，再來一次真• encore，謝安琪帶淚收拾行裝。
有幾灑脫，放手還得需經過掙扎鬆開。
後會有琪！
十年的行李
每一次個唱，謝安琪都有她的 message。
暫別樂壇的《拾回》，有行李篋的舞台，皮篋的手挽位，堅•真皮包住，盛載十年珍貴回憶，見證她選擇的另一條路。
老公帶錯路
一連兩晚，趕拍新劇《幕後玩家》的張繼聰，攝時間每晚七點便趕到紅館為老婆打氣。下午先送上一個花籃冧爆老婆的他，一到埗即上前攬實剛彩排完的謝安琪。
二人拖住手走到花籃面前，欣賞張繼聰精心炮製的情話：「阿 Kay：認唔認得我呀？我真係好鍾意你㗎！可唔可以影張相呀？狂迷張繼聰」，令人妻 Kay甘願退下來的，也因如此！
準備出場，謝安琪由老公攬實陪住走過後台的通道準備上台，不過張繼聰竟然帶錯路，開錯門。
暫別樂壇，十級緊張的是將要獨力搵錢養家的張繼聰。
張瞻星閃閃
兩晚都有做媽咪嘉賓的八歲張瞻，星閃程度不遜於 Uncle劉華與 Juno哥哥。表演慾強，有台型又淡定，瞻瞻與媽咪踩台跳街舞，完全挑起觀眾神經，尖叫聲此起彼落。
事後瞻瞻被問初次演出的感受，他隊住零食接受訪問。「開始有少少緊張，但跳到中間就冇。（係爹哋還是媽咪鼓勵你參與演出？）係媽咪鼓勵我，排咗兩個月嘞！」
好滿意自己演出的瞻瞻，更率直地爆出一句：「如果媽咪仲再有一個最後演唱會，我肯定會繼續跳。」
準備出場的 Juno，立即走近同瞻瞻 give me five，俾 like。八歲張瞻精靈到爆，也是謝安琪選擇留守家庭，給過幾年就步入反叛期的兒子，更多一起成長的時間。
騎呢坤哥錯失劉華
至於有份做女神 Kay個唱嘉賓的坤哥，每晚都 set個靚頭上台，原來他是用啤牌加夾，圍住個頭定形，方法騎呢。
一連兩晚，坤哥花最多時間唔係掃地，是捕在電視機前睇騷，尾場他又黐實在嘉賓劉華的化妝間外，等候影合照。
點知坤哥臨陣退縮，一見劉華出現，就驚到企到老遠，唔敢埋身，結果錯失集郵良機。
撰文、攝影、攝錄：娛樂組
|
鍾意就快D Share啦！
|
|
|