原告姚垂廣十六年前涉嫌喺旺角活力卡拉 OK非禮兩名女子，到北九龍裁判法院應訊，最終因證人口供矛盾脫罪。《蘋果日報》圖片
眾人諸事
夜場收費歧視案 原告未拍過拖
男蒲友嫌夜場男女收費不同，透過平機會控告夜場性別歧視勝訴，引起社會熱議。四十四歲嘅原告人姚垂廣係高級警員，十六年前涉及旺角卡拉 OK非禮案但脫罪。佢似乎蒲咗好多年，各界都好奇點解佢「咁多事」。
原告母親同本刊講，阿仔細個嘅志願係做警察，佢係孝順仔一名，好肯幫朋友，老豆喺佢十幾歲因胃癌去世。雖然好仔，但咁多年冇帶過女朋友見阿媽，感情生活相信係零。姚太力撐阿仔本性善良正義、追求公平，今次係小事一樁。
不過，姚太都唔明阿仔點解告人，「人哋係咁㗎嘛收費，你嚟就嚟，唔嚟就算，我都叫佢唔好理。」作為人母，佢驚阿仔在明，人哋在暗，卡拉 OK行業咩人都有，擔心阿仔被人伏、被人打，「唔係話警察唔驚，警察有後眼呀？」
業界企硬 夾錢撐被告翻案
另一邊廂，酒吧業協會副主席錢雋永事後收到敗訴嘅夜場老闆求助，估計原告入場後發現「啲女唔夠多」先投訴。依家未知老闆會唔會申請推翻缺席裁決，但業界好齊心，有人提出夾錢撐被告。佢同十幾個酒吧老闆聯絡過，一致企硬唔改收費，以不變應萬變。
自由黨青年團主席李梓敬上星期去蘭桂坊收集簽名，表達對裁決不滿，話短短一個鐘已有大約二百名男女簽名，本星期一帶同簽名到平機會請願。
蔡廉明：上一個十年造就《十年》
《十年》獲金像獎最佳電影，今年四十五歲嘅監製蔡廉明（ Andrew），頭三十幾年嘅人生可以話係「贏在起跑線」。佢爸爸係突破機構創辦人蔡元雲， Andrew喺美加讀大學，碩士課程原來係讀電影。九五年返香港，走去做 IT人，一做就十年，做過上市公司，亦做過 startup，仲做到營運總監添。
○四年聖誕， Andrew發現個腦生咗個高爾夫球咁大嘅良性腫瘤，做咗兩次大手術同埋廿五次電療，仲要停工半年，令佢開始思考做人嘅理想同召命。佢毅然放棄高薪厚職，讀三年神學，然後喺青少年機構做媒體工作，用鏡頭回應社會需要，「嗰時都唔係想做咩警世電影，只係默默去做，完全冇計算，只係忠於自己，忠於使命。」
機會留俾有準備嘅人，佢話正正係呢十年嘅媒體經驗，先會成就今日嘅《十年》，「香港係好急嘅地方，商業社會急功近利，但有啲嘢冇捷徑……所以我話需要謙卑，唔好計較，唔好怕蝕底。」
林建岳批《十年》 踩細蓉倒旅發局米
《十年》拎咗香港金像獎最佳電影後，成班紅底電影人發現「大鑊鳥」，驚阿爺發火於是急急忙忙排住隊狠批部戲以表忠誠，當中當然唔少得全國政協林建岳，佢話《十年》得獎係香港電影界嘅不幸。
呢位負責俾錢拍電影嘅「電影人」仲未肯收口，再喺 now節目用雲吞麵打比喻批評《十年》：「如果我話俾你聽有間雲吞麵鋪係全香港最好嘅餐廳，你會唔會服氣？」此話一出，即時辣着唔少香港人，話晒雲吞麵係香港特色地道美食，仲承傳香港飲食文化。
其實，唔少旅客嚟香港都會專登食番碗雲吞麵，車胎人米芝蓮亦推介過唔少雲吞麵店，其中名店何洪記仲成功摘星。諷刺嘅係，連旅發局都睇中雲吞麵，喺網頁向旅客推廣，過去嘅「香港美食之最」比賽，何洪記同另一間正斗粥麵專家甚至拎過比賽至高榮譽金獎，但身為旅發局主席嘅林建岳，竟然睇唔起細蓉，擺明倒旅發局米。
撰文：巫不言
news@nextdigital.com.hk
|
鍾意就快D Share啦！
|
|
|