除了薪酬吸引，林保怡周家怡都認為 ViuTV敢創新，自由度大。
娛樂偵訊
唔使簽長約 ViuTV歡迎無綫人
ViuTV四月六日開台頭威頭勢，已經打亂對手陣腳，大台更計劃開「真人騷」節目，抄橋砌過。其實無綫固步自封，又愛用長約綁死藝人，打游擊戰的 ViuTV要破舊立新，播映中的《瑪嘉烈與大衞之綠豆》，演員林保怡、周家怡、廖碧兒全部簽部頭合約；洽談中有機會合作的藝人，包括已約滿無綫的楊怡、胡杏兒、馬德鐘、吳卓羲，總之打開門，歡迎！
跟風做真人騷
主打創意之外， ViuTV亦好識避重就輕，該用力的才用！甫開台，無綫黃金時段三線劇集及節目收視全部下跌，真人實況旅遊節目《跟住矛盾去旅行》更加好評如潮，公式化的無綫，已經有意跟風。
「對外好似冇嘢咁，其實呢排無綫班高層係咁開會，仲叫班監製學 ViuTV，整幾個真人騷節目，搞到班監製頭都痕埋。」一名無綫人說。
大台習慣用長約綁住藝人，合約年期更愈簽愈長，見班花旦小生大逃亡，又逼未約滿的藝人加簽，搞到個個怨聲載道。
ViuTV偏偏唱反調，明知暫時無論製作和簽人，都唔可以有太大包袱，索性 project計。拍攝中的《瑪嘉烈與大衞之綠豆》，和即將開拍的《三一如三》，演員林保怡、周家怡、廖碧兒、溫碧霞，一律部頭合約。
「無綫覺得捧紅咗你，你約滿走會好蝕，所以唔簽長約就唔捧， ViuTV主力唔係製作劇集，做法可以好唔同，彈性會大好多。」
劇酬大台兩倍
ViuTV同藝人合作自由度大，出手亦比無綫高，《綠豆》的林保怡，一集酬勞有三萬元，是無綫的兩倍。
「雖然未算天文數字，但相對向來刻薄嘅無綫， ViuTV出手絕對唔低。」知情者說。
就 ViuTV以高價簽藝人合作一事， ViuTV製作部副總裁金廣誠強調，不是用錢吸引藝人。「我哋係用優質劇本吸引演員，如果劇本唔好，多多錢演員都未必肯做！」
對於 ViuTV用部頭約形式跟藝人合作，他亦有一套見解。「冇必要用長約綁死藝人，我哋希望同更多不同類型嘅藝人合作。」
提到有傳 ViuTV傾緊楊怡、胡杏兒、吳卓羲，金廣誠說：「點解唔會？只要劇本啱，邊個都有可能！」
打到殘
ViuTV開台當日，晚上以《 8點新聞報道》硬撼毛舜筠和黎耀祥的新處境劇《愛•回家之八時入席》，結果《愛》劇由週一（ 4/4） 28.3點收視高開，跌至 22.3點，週四和週五亦只維持在 23.4點和 22.8點的低水平；至於郭晉安和楊怡孭飛的《末代御醫》，硬撼《太陽的後裔》，收視更慘淡，只徘徊在 20.2至 21.9點。
其中週三（ 6/4）晚， ViuTV的《跟住矛盾去旅行》，更令同時段的《 Do姐有問題》收視跌至平均 17點，成為節目最低收視的一日，就連以謝安琪、鄭嘉穎、陳凱琳孭飛的《殭》，首播日只錄得 24點收視，週三（ 13/4）更一度跌至 21點。
撰文、攝影、攝錄：娛樂組
|
鍾意就快D Share啦！
|
|
|