熱爆娛樂: 張栢芝癲價 2億放暗盤冇人吼 [壹週刊

2016年4月21日星期四

張栢芝癲價 2億放暗盤冇人吼 [壹週刊 - 1363] __,栢芝,張栢芝,M1,

探熱針

張栢芝癲價 2億放暗盤冇人吼

同謝霆鋒離婚後，帶住兩個仔做了一段時間游牧民的張栢芝，先後移居加拿大及新加坡；直至去年，得教會弟兄姊妹幫手，幾經辛苦，成功安排兩子入讀位於沙田的基督教國際學校，三母子才回流返港。

據知，有計劃搬入大埔康樂園的栢芝，去年已將現居的世紀大廈放暗盤，叫價 2億，但放盤一年，依然冇人吼。由於樓市持續回落，業界人士稱，栢芝持有的單位，市值已跌穿買入價，鍾意儲磚頭的栢芝，今次要做「樓蟹」。

劈價減四千萬

在新加坡、加拿大等地都有物業的張栢芝，一一年摸頂，以 1.28億買入港島中半山世紀大廈連天台單位，破晒屋苑紀錄。

據知，為咗方便囝囝返學，一直想搵屋搬的栢芝，去年已將世紀大廈單位交地產經紀放暗盤，叫價二億，十分大咬！

去年尾，美國落實加息後，見勢色唔對，栢芝於是劈價，將放盤價下試到 1.6億，可惜依然冇人吼。

身兼父職的栢芝難得放假，揸住架紅色法拉利，親自到學校湊兩個仔放學。

三母子加埋個同學仔去沙田食平價壽司醫肚。

九歲的 Lucas愈大愈似霆鋒，但比較文靜，栢芝買電器時， Lucas揸住 iPad不停篤。

搬返康樂園

據業界人士透露，過去半年，中半山一帶二手樓價有跌冇升，銷情慘淡，栢芝持有的連天台特色單位，亦無法幸免。

「樓市係咁跌，呢類特色戶就跌得仲甘，中半山一帶成交，一個月都冇五單，佢（栢芝）個盤一直仲係暗中放緊，但唔好話賺錢，以目前市況，平手離場都冇可能，個單位現市值大概一億，已經比買入價跌咗超過兩成，除非佢肯蝕讓，咁可能會吸引啲投資者執平貨。」一名資深地產代理說。

過往成日同啲仔請假周圍飛，個底花晒，搞到 Lucas到咗入學年齡，都搵唔到學校肯收。返港後，栢芝靠教會姊妹鄧萃雯和牧師幫手， Lucas同 Quintus先入到沙田基督教學校。所以栢芝一直有打算搬返大埔的康樂園，等兩個仔返學唔使嘥咁多搭車時間。

「兩個細路要過海返學，交通時間都成粒鐘，太辛苦栢芝寧願兩個仔有多啲時間玩同休息。大埔去沙田，半粒鐘唔使，來回計慳番好多時間！」栢芝身邊人透露。

Quintus好黐身，成日扭栢芝抱，仲要媽咪幫手著鞋仔。

Quintus唔耐煩嗌悶扭計，要阿媽錫番。

掃咗兩大袋戰利品，鋪頭員工幫手搬上車。

一拖三食壽司

年前拍《封神榜》，栢芝辣㷫中國星老闆向華強夫婦，被公開數仲講明「永不錄用」，近年在內地以接真人騷為主的她，早前應邀接拍一部中德合資的新片，有戲拍，栢芝吓吓自己嚟，搏晒命。

由德國拍完戲返港，栢芝馬上返回媽媽崗位，出動紅色法拉利新車去湊仔放學，之後三母子揸車直駛去沙田新城市廣場，同行仲有一名同學仔。

一大三小在一間平民價壽司店醫肚後，再去行電器鋪，其間 Lucas拎起 iPad起勢篤，細佬 Quintus就好黐身，成日扭抱。

栢芝使錢從來唔手軟，大大袋玩具加埋在電器鋪掃咗兩大袋戰利品，滿足晒！仲要勞煩售袋員幫手搬上車。

11年，栢芝以 1.28億摸頂買入世紀大廈連天台單位，如今賬面已蝕超過兩成。

康樂園

跑馬地翠景樓

細仔唔跟老豆

自從謝霆鋒同王菲「世紀復合」後，和栢芝唯一關連就是兩個仔，逢大時大節要應酬拉姑要見孫，每次霆鋒都要負責開口問栢芝借仔，做「親子騷」。

「霆鋒大部分時間都响北京，閒時幾個月先見一次仔，栢芝仲同身邊朋友講，話 Quintus大大吓都係唔肯跟老豆，一聽到要同爹哋出街，就扭計，栢芝都氹佢唔掂！近半年謝家吹雞食飯，有時都係得 Lucas去。」栢芝身邊人透露。

夫妻緣盡，栢芝亦有了自己的社交圈子，上月復活節假期，三母子去泰國放電！同行還有一班家長，大人、細路有十幾人。