「鴨王」何浩文（Dominic）越級挑機「大律師」林作硬撬「十優港姐」麥明詩成城中熱話，心口掛住勇字的他自爆家底及財力絕不遜於林怍，但原來兩男最大共通秘技就是擅長到處留情識新女，網上突然流出Dominic跟擁有34C上圍的電台女DJ安采妮（前名馮殷，現英文名Charlie）的多張合照及多條WhatsApp對話，力證他的溝女手段何其勁！
頭像一樣
雖然相中未見兩人親密照，只有Dominic抱着Charlie的大白熊MiMi與哥基合照，但從上款為「Dominic」的WhatsApp中，有人相約玩「大話骰」及戲言「灌醉」，又有「見倒（到）你凌空打橫瞓」及「下次過嚟探mimi順便」、「mimi太過可愛」、「留畀你食」等對話，言談窩心又帶點曖昧，「Dominic」似正發功溝女。《東網》亦曾以WhatsApp聯絡Dominic，發現兩個「Dominic」用同一張貓咪相作頭像，令人覺得「Dominic」大有機會正是「鴨王」。
上門拍片
有傳Dominic兩年前與當年只得20歲的Charlie因合作電影而邂逅，男方其後暗溝Charlie，曾相約女方唱K及玩「大話骰」，在K場又狂灌酒量淺的Charlie，但在她仍未飲致斷片前，剛巧有其他電影工作人員到場，兩人未有再「進一步」。之後，傳Dominic以拍「港女生活」的YouTube片為名到訪Charlie寓所，有人曾自稱會帶同朋友同行，及要求Charlie穿背心短褲上陣拍攝，可是當日只得Dominic一人出現！Charlie初時大為愕然，但仍有開門讓他入屋。拍完短片後，Dominic喪玩她的兩隻狗狗，疑因有家傭在場，Dominic玩完一輪後便離開，自此跟Charlie斷絕來往。
差啲有錫錫
《東網》即致電Charlie追問Dominic有否曾追求她？她初時不願多談，多番追問下才說：「都算係（追求）……但我冇同佢拍拖㗎！佢好口甜舌滑！（有傳佢想喺卡拉OK灌醉你喎？）嗰次係電影煞科慶功，嗰晚我同佢到先，佢同我玩『大話骰』時不斷咁灌我飲酒，我話過我唔飲得，都飲到斜斜哋（醉）。」她又說Dominic曾摸到她的膊頭及手，指男方表現得「真係好熱情」，問可有被咀？她估計：「如果唔係有人嚟到，我諗可能會囉！嗰晚我都好驚，未遇過呢啲情況。」
Charlie自認「豬」
講有有傳Dominic到訪其家，Charlie承認當時Dominic邀拍片，問到「一男一女共處一室，女仔易有所失」？她說：「咁又冇！因為有姐姐（家傭）喺度，姐姐事後話畀父母知，結果鬧咗我一大餐！事後我都覺得自己好『豬』，點解畀男人入屋，之後就再冇聯絡。」問到如今若再見對方可會感尷尬？Charlie稱會盡量避開，又指經理人陳達仁為此事向她大興問罪之師，狂抦她：「蠢，下次唔好。」
Dominic否認有灌酒
Dominic受訪時則似乎對Charlie「無乜印象」，初時稱不認識前名為馮殷的Charlie，不過看完記者的相後，才承認曾跟她合作：「同佢幾年前拍過電影，但冇對手戲，兩年前請過佢拍YouTube片，之後冇再聯絡。」問可有追求過女方？他斬釘截鐵說：「絕對冇！」他再次接受訪問時強調沒有跟Charlie私下聯絡，問到可有到訪其香閨及在卡拉OK灌她飲酒？Dominic說：「有去過咗佢屋企一次拍嘢，我有帶朋友一齊去。（有冇相證明？）我冇影！而嗰次去卡拉OK都係成班人，我冇灌佢飲酒，亦冇玩大話骰」自稱只識玩「包剪揼」，又嘆有人借他博宣傳。
|
鍾意就快D Share啦！
|
|
|