娛樂偵訊
扮阿婆呃 like 李蕙敏：我自己都心虛！
由被指欠卡數被追數到成為人妻，李蕙敏（ Amanda）化險為夷；稱得上樂壇坎坷之星的她，今年初簽約新經理人公司再戰樂壇，在派台新歌《不分不散》 MV中化身阿婆呃 like，更一手包辦造型，但始終唔係真材實料，途人勁𥄫後， Amanda亦不得不投降：「我自己都心虛！」
自製阿婆 look
昔日曾一度進逼天后級的李蕙敏，除了慘情歌拿手，形象也是強項。如今再戰樂壇，派台歌《不分不散》決定由阿婆上陣演繹，同導演商討後， Amanda自薦親自變身，連形象亦一手包辦。
平時靚衫，中環、銅鑼灣行一圈有收穫，至於耆英時尚， Amanda決定由街市開始搜索，於乾貨攤檔巡一圈已經有所收穫，加上髮型同化妝工作人員幫手，變阿婆樣，話咁快現形。
不過， Amanda變阿婆全靠秘密武器——雨傘。
「我係參考我媽咪，佢已經八十幾歲，成日用把遮篤住當枴杖，有咗佢（把傘）真係似好多。」李蕙敏說。
惹人懷疑
阿婆造型維肖維妙， Amanda不忘自拍 send俾老公 Serge欣賞，獲回覆「 Amazing！」鼓勵。
成本有限， Amanda游走中上環一帶，於老人家出沒地點進行拍攝，但導演嗌 cut後，加上「阿婆」動作太敏捷和太過皮光肉滑，均令途人滿頭問號！
「真係好好笑，我自己都心虛，唔係好敢同啲途人有眼神接觸；佢哋啲反應好得意，初頭冇乜反應，去完街市再去藥房睇廁紙，睇睇吓啲人開始有啲奇怪，係咁望實我。」
MV以公園作為尾站，因為人較少， Amanda當正自己阿婆，開始嚟料！經過在公園長櫈瞌眼瞓的伯伯， Amanda唔理咁多，坐近對方身旁，等攝影師可以拍到老人家在公園的真實狀況。
低成本製作，惟有靠寫實搏加分。
坎坷天后
17歲出道的李蕙敏（ Amanda），入行 28年，經歷無數起跌，經典歌《你沒有好結果》算是個人歌唱事業中的代表作，從天后到蛋散，閱歷人生坎坷。
衰落期
98年，加入寶麗金的 Amanda事業開始走下坡，加上聲帶生繭導致失聲的她，幾乎絕跡樂壇，其後曾自資成立唱片公司 Eaft Fino，又從事時裝及珠寶工作， 04年更於中環開時裝店，但大多有前冇後。
復出
13年，下嫁拍拖三年的英籍男友 Serge Micallef後，於九展舉行首次個人演唱會，又以全裸造型上陣宣傳新歌《銷魂》，其後與大迴音國際（ Big Echo）簽約三年， Amanda上月推出全新廣東歌《不分不散》，全面復出。
撰文、攝影、攝錄：娛樂組
|
鍾意就快D Share啦！
|
|
|