為咗呢一身肌肉，城城要戒打邊爐之餘，連豉油都唔食得，咖啡每日都由六杯減到只可飲一杯。
娛樂偵訊
城城爆肌玩雜技 紅館史上最貴
號稱紅館史上最昂貴，製作費高達五千萬，一連十五場的《郭富城舞林密碼》演唱會，今個星期日（八月二十一日）正式開鑼，叫得「舞台王者」，城城當然唔會揸流攤，單係個變形金剛智能舞台，已經超震撼！一向愛挑戰高難度的城城，今次更十足雜技團高手一樣，玩埋人肉風火輪同空中飛人。玩到咁盡，其他人要做演唱會點算好吖！
驚險演出
城城開演唱會好似做雜技團一樣。喺巨輪上做出連串驚險高難度動作，又連人帶輪三百六十度車輪轉，全程零安全措施，這個人肉風火輪，百分百賣命演出。
唔夠喉！壓軸仲有空中飛人，吊起到兩層樓高 fing來 fing去，相當驚險刺激。
爆肌誘惑
城城開騷前兩個月已經閉關做準備，謝絕一切應酬，連晚晚都可以要嘅火鍋都冇食過，只為保持最 fit身形，加上每日排舞十五個鐘，返到屋企仲要 keep住健身。
付出有回報！城城一除衫，胸肌腹肌人魚線全部爆出，睇到全場觀眾不停尖叫。
變形金剛舞台
入行邁向廿六年的城城，每次開演唱會都唔會孤寒，舞台肯肯定落重本，令觀眾覺得抵睇到爛！今次，更加破晒紅館紀錄，整個演唱會製作費高達五千萬，貴絕全港！
先了解一下王者個舞台，有四個超巨型升降組件，可以升到上十米高，仲可以同時旋轉兼變形，整個舞台都用上 LCD，做出變化多端效果，城城更會將這個空前嘅舞台設計，申請入健力士。
想成家立室
從來唔主動提感情事嘅城城，今次破例喺台上話希望成家立室，有自己小朋友；不過首場並未發現女友方媛出現，城城坦言女友因工作睇唔到頭場。
「女朋友一定會嚟嘅！佢有祝我 good show，過幾日等佢冇咁忙，都會飛嚟睇我。」城城說。
撰文、攝影、攝錄：娛樂組
來源 source: http://hk.next.nextmedia.com
|
鍾意就快D Share啦！
|
|
|