想在電影做出好成績，阿 Sa氹掂英皇泵水開戲，自己更首度參與幕後工作。
娛樂偵訊
阿 Sa親自搵上門 余文樂講錢冇面俾
去年憑《雛妓》提名金像獎「最佳女主角」的蔡卓妍，一直想在電影事業做出成績，為求發揮，親自開口求公司投資開拍李敏的愛情小說《原諒他 77次》，甚至做埋統籌。據知阿 Sa本屬意雙方識於微時的余文樂，但有指樂仔方面認為阿 Sa公司未必俾得起錢，劇本都未望過，便一口拒絕。
你做初一我做十五，阿 Sa把心一橫，搵余文樂死敵，周柏豪頂上。
角色度身訂造
同陳偉霆分手後，蔡卓妍收拾心情，將悲憤化為力量，專注在電影方面闖出成績；去年憑《雛妓》獲提名金像獎女主角後，她的目標更加明確，雖然一直有劇本送上門，但好想攞獎的阿 Sa卻嫌角色冇發揮。
直至睇到合作過《雛妓》、負責編劇的李敏一本愛情小說《原諒他 77次》，阿 Sa認為書中的女主角就好似為自己度身訂造，於是膽粗粗向英皇提出，投資拍成電影，還攬上身做埋統籌搵演員。
「喺公司咁多年，又咁聽話，老闆（楊受成）都好睇阿 Sa台戲，加上見套戲 budget唔太高，公司好就快應承佢開呢個 project！」一名英皇電影員工透露。
睇錢大過天
公司肯開水喉，阿 Sa立即開 turbo，出盡人情牌搵好友幫拖。阿嬌、 Yumiko榜上有名，要不是容祖兒檔期排滿，都一定走唔甩。男主角方面，阿 Sa認為余文樂是最適合人員，為表誠意，她更親自聯絡，點知對方連劇本都未睇，已經被噴到一面灰。
「阿 Sa私下好 casual咁同余文樂傾嘅，話自己有個新 project，想搵佢做男主角；不過阿樂就話大家識咗咁多年，都懶得轉彎抹角，話佢而家收緊嘅片酬，英皇未必肯俾，叫阿 Sa死心。講到咁都冇彎轉，阿 Sa唔嬲就假，親自搵你梗係想你幫幫手，但阿樂連劇本都未睇，就 say no，使唔使睇錢睇到咁大呀！」知情者說。
圈中可以同阿 Sa拍檔愛情片，啱心水的根本不多，有人提議她搵余文樂的死敵又抵用得多的周柏豪合作。上週五深夜，電影在觀塘拍夜班外景，阿 Sa全晚黐住阿嬌，至於首次合作的周柏豪，不用埋位時就坐定定在電視機前睇 playback，落足心機。
撰文、攝影、攝錄：娛樂組
|
鍾意就快D Share啦！
|
|
|