34歲嘅孫慧雪之前被踢同有米男友Edwin Lo，原來冇分手，仲話佢哋已經喺東區共賦同居(新聞連結：http://bit.ly/2brCPvQ )，但原來佢哋唔止同居，仲好事近添呀，阿雪上周日(14日)，仲同Edwin去咗銅鑼灣嘅名店買婚戒喇！日前夜晚約7點幾，阿雪同Edwin喺銅鑼灣利園行街街，雖然阿雪都公開咗同Edwin拍拖，但係佢哋行街時都顯得好避忌，只係肩並肩同行，冇拖住手仔咁行。佢哋嘅第一站就去咗卡地亞，阿雪同Edwin一入去，店員就好熱情咁招待佢哋上咗二樓，之後店員就攞咗好多戒指俾佢哋試戴，Edwin同職員不時就俾吓意見咁，當店員行開，佢哋就按捺不住，開始打情罵俏，Edwin不時走近阿雪耳邊講嘢，阿雪聽到之後就冧咁作狀打男友，真係好Sweet㗎！睇咗約20分鐘，Edwin就扑搥俾錢，離開時，外面就落雨，佢哋就快步跑去對面，唔知係咪落雨關係，阿雪就拖住男朋友過馬路；但過完馬路，警覺性又返來囉，阿雪好自覺咁鬆開男友嘅手，不過就好有默契咁一齊行咗入Bvlgari，同樣睇咗約20分鐘，今次就空手而回。接住佢哋再行去Sogo，當時都仲落緊雨，咁Edwin就負責拎遮；見到佢都好想拖住阿雪，但阿雪見到好多人，就好避忌咁冇俾男友拖住。行到去Sogo，佢哋撞到朋友，就停下來傾咗一陣，傾完計就好快咁走入Sogo嘅Tiffany，又係試戒指，但呢次就主要係阿雪試，Edwin就係咁俾意見。試咗大概試咗30分鐘，同樣冇收穫，之後就行去利舞台方向攞車離開。事後問雪雪此行是否買婚戒，佢以WhatsApp回覆《蘋果》：「都無買到，我哋拍拖係有咁嘅方向，如果係結婚，我會同大家宣佈，多謝大家咁關心。」
| 阿雪孖男友Edwin一齊去買婚戒。(攝影：畢紹基、吳耀輝) | | |
| | | |
| | | |
| | | |
| | | |
|
鍾意就快D Share啦！
|
|
|