財金界「燈神」，意思係呢位分析員成日無準，有股民更加話：「如果燈神估市，我哋做相反就得㗎喇！」不過，對於燈神，佢哋永遠都係越鬧越想睇，要數財金界燈神，點可以唔提股壇紅透半邊天嘅「沈大師」沈振盈？佢深信唔係燈之餘，仲話自己好多時嘅評論都中得好緊要添。唔知大家又點睇？即刻睇睇佢同彩兒、Kitty嘅一席話
彩兒：你2006年已經晨早唱淡大市，點知2007年有港股直通車嘅傳聞，推動大市勁飆去到近32,000點，畀一眾網民唱，呢條路一定唔易行。
沈：「燈神」係大約2007年嗰陣，因為網絡文化興起，一群「巴打」同「絲打」起嘅名，一定係貶義㗎喇，但邊有股評人次次中、冇錯過呢？我估就冇喇！點解會成為眾矢之的呢？我覺得係因為自己講股係唔會跟大隊，原則上，若果睇淡，即使升緊我一定都會表達意見！咁樣會得罪好多人，我短線一錯就會畀人捉住嚟踩，甚至有行家趁機撬我啲學生。
沈：好多時我評論都中得好緊要，但問題係股評分析有兩種，第一係技術性、短線，講完呢兩日唔升就當錯，呢類嘅話，香港所有股評人都係燈大家錯嘅比率都好高！但若然係中長線分析，3至6個月嘅基本面分析，我講嘅嘢好多時都啱。早兩年濠賭股咪係囉，我唱淡完佢冇即時跌，仲升多一輪，但係好快就轉勢，跌足一年有多！如果冇料到，就唔會咁多人聽我講嘢啦，公道自在人心，不過，我真係要多謝叫我「燈神」嘅人，吸引到更多股民關注我。
Kitty：每個人都有脆弱嘅一面，你會唔會番到屋企，偷偷哋攬住老婆喊？
沈：最初係好唔高興、有內疚，會諗係咪因為自己講早咗股災而令股民損失？但後來發覺啲人唔啱就鬧爆，啱就玩消失半年，其實就係一種網絡欺凌，所以我後來就唔理，更加將「燈神」轉為自己嘅資產，提升知名度，仲自認係「燈」添！我信自己有料，人哋係點都話我唔到。
沈：人哋想我唔開心，我就愈要好畀佢睇，要有正面人生觀，因為我父親係做廠，收入好波動，家庭生活都會受影響，由細到大遇到嘅逆境多，所以我EQ比人哋高，唔會忌住唔講，最緊要係企得起身，起碼依家行內地位唔會差過其他人，覺得唔舒服咪唔好睇囉。
彩兒：你受最大凌辱係邊一次？
沈：2007年我一路睇淡個市，原因係外圍因素，但總係冇人信，後來港股直通車，我就喝住啲人唔好再入市，當年就最多人攻擊！原因係佢哋瞓身落注，我日日唱淡係好乞人憎，佢哋講到我係「為非作歹」、「殺人全家」、「害人害物」。當時對我影響最大，每日寫文章都有幾百個回應鬧我，但我愈鬧愈敢寫，結果最後贏咗。近年好興將我啲文章改頭換面屈我、又有Youtuber抽水等等啦，但今日已百毒不侵。
Kitty：你早喺2006年已唱淡，呢啲叫「狼來了」喎。
沈：其實最緊要係求結果啫，2006年前滙豐控股（00005）發盈警，我已經預計樓市會爆煲，唱淡期間我都冇叫人乜都唔好買，評論要睇基本因素同短線技術面，2007年8月大跌一輪後，我叫人以技術面捉反彈浪又畀人話……2007年大升浪冇入市，係搵少好多，但100個當時入市嘅人，99%係走唔甩兼輸凸，因為信錯咗基本分析。如果明知基本因素唔得，就要勇敢講出嚟，呢樣係股評人嘅責任。
彩兒：你記唔記得你最「燈」嘅一次？哈哈！
沈：如果唱好就即跌、唱淡就即升嘅話，其實每個股評人都有，所謂最「燈」係一段時間嘅錯……依家流行即食文化，太流行短炒投機，投機係擺一陣即升，唔對路一定要即走，投資係睇好股票潛力，分2、3注去買去贏錢，如果跟評論去投機，你咪妄想啦。我敢講，大行仲「燈」！5間一齊睇好，我都敢唱淡啊！
Kitty：同大師講咁耐，電話都響唔停，點做分析啊？
沈：其實好靠多年嚟不斷累積經驗，趁未做直播節目前可以用iPad搵資料同新聞做功課。我工作量係好大，以前每日只瞓3至4小時，依家已經多咗，有5至6小時。我又試過4點瞓，5點畀人急Call做突發節目；大時大節，我試過一日跑5個台添，入行頭15年，我一日病假都冇請過，所以對工作有熱誠好緊要！我有諗過提早退休嘅，但試過跟老婆去加拿大休息幾日我已經頂唔順，所以我應該會做呢行直到做唔到為止。
彩兒：「日理萬機」係孖妹對沈大師生活嘅睇法，我哋喺佢寫字樓蛇王一粒鐘吹吹水，見到佢有N位同事搵佢，玻璃門外猶如文件滿天飛，係咁揮手示意叫佢睇文件，我哋真係畀個「服」字佢喇。
|
鍾意就快D Share啦！
|
|
|
