近日樂易玲重受老闆陳國強器重，將邵氏電影大搞，故她招兵買馬，撬走唔少大台台前幕後。
娛樂偵訊
《使徒》《城寨》大收 珍姐迫走監製功臣 人工一蚊唔加
工字望打出頭！《使徒行者》、《城寨英雄》的幕後功臣監製文偉鴻，在大台立功成為搶手貨；可惜過往是曾勵珍對頭梁家樹「親屬」的他，未有因功獲加持，反而被珍姐處處為難，諗計要將他踢走。文偉鴻心灰意冷，決過檔去珍姐另一死敵樂易玲的邵氏山頭，與敵人的敵人做朋友。
㩒唔住眼中釘
大台高層作風向來用人唯親，《城寨》監製文偉鴻（ Jazz）本是梁家樹派系，自從對方退休離開無綫後，製作部由分成兩派變成曾勵珍睇晒，非「珍姐黨」的當紅監製文偉鴻，頓變孤兒仔。
據知，文偉鴻雖然是眼中釘，但他有實力運又高，由《 My盛 Lady》、《使徒行者》到《城寨英雄》，套套高收，㩒都㩒唔住，即使有人搵盡理由，想將他和他的作品打入冷宮，始終無從入手。
劇集有收視，連拍電影都掂埋。過去暑假檔電影《使徒行者》，由王晶同樂大媽掛監製名，文偉鴻繼續做導演，票房在內地收逾七億，有份立功的他，火速被內地製作單位挖角，就連自己友樂易玲亦吼到實，想將他撬過邵氏。
在大台紅褲仔出身，由助導捱到上監製的文偉鴻，雖覺得做生不如做熟，但珍姐不但未有考慮人才流失而加碼留人，反而趁勢逼對方走。
大台告別作
「 Jazz（文偉鴻）喺大台做咗廿年，對公司係有感情，所以初時有人叫佢走，佢都唔諗，仲同珍姐坦白話有人挖佢，只係想公司象徵式咁加少少人工當誠意，佢就會留低。唔知珍姐係覺得 Jazz未夠班同佢講條件，定抑或認為佢始終唔係自己人，竟然留都唔留，仲講明一蚊都唔會加。 Jazz點可能唔心淡，咁即係變相逼佢走啫。」知情者說。
珍姐當草，將文偉鴻當寶的樂易玲決定人棄我取！
「《使徒行者》電影版掂咗，樂小姐即刻攞晒威，陳生（殼王陳國強）叫佢盡量搵多啲人才，似乎好放心交晒邵氏製作俾佢。雖然 Jazz只係得四年監製資歷，但樂小姐覺得佢仲有大把貨，亦唔擔心俾人背後講佢撬自己人，好落力游說 Jazz去邵氏。」知情者說。
沿用《城寨》班底陳展鵬、胡定欣拍新劇《同盟》的文偉鴻，已立定決心，將此作為在大台的告別作，之後，便轉投邵氏，幫樂易玲打仗。
撰文、攝影、攝錄：娛樂組
|
鍾意就快D Share啦！
|
|
|