娛樂偵訊
唔使靠男人 曹央雲秘揸 7億物業
94年亞姐季軍曹央雲，八年前跟上市公司主席何永安分手後，母兼父職獨力照顧兩個女，生活無憂的她，經常孖兩個女遊學旅行、又一齊學彈琴母女檔表演。原來曹央雲手持 7億豪宅物業，揸磚頭，永遠比靠男人可靠。
為細女台中住一個月
上週四（十一月十日）中午拎住個 tailor made Hermes袋的曹央雲到中環太子大廈 shopping。四十有二，依然好弗的她，是日著短裙騷長腿，在 Chanel兜了一個圈，再上一層睇名牌水晶，唔貴唔吼。
這位富貴單親媽，現跟兩女同住市值過億豪宅，不過相比以前，生活質素還是差一截。
「佢以前住山頂二萬呎獨立屋，有廚師、管家同埋十幾個保鏢，不過佢話都唔及而家開心，分手之後，央雲將成副心機擺晒喺栽培兩個女，亦好珍惜同佢哋一齊嘅每一日。」知情者說。
有女萬事足，數年前，為參與跟大女同台表演的校內活動，曹央雲開始學彈琴，後來細女學拉小提琴，她亦搵老師上堂，試過三母女在文化中心一齊表演。
「佢唔係冇人追，不過根本冇時間拍拖，乜都係考慮兩個女，所以咁多年仲係單身。今年暑假，三母女住喺台中成個月，只為俾機會個細女，可以試吓喺海邊同樹林拉琴，感受同大自然一齊嘅聲音。佢放响兩個女身上嘅，唔單只係物質，仲有成擔心機。」知情者說。
未識何永安已揸上億磚頭
手持多個物業的她，生活無憂。其實曹央雲節儉慣，十幾年前已經夠錢買山頂獨立排屋。
「佢份人好節儉，出嚟做嘢冇耐，已經識得將所有錢買股票同磚頭，最初買細價樓東港城、滙景花園，賺到第一桶金，就投資半山樓。當時經濟好，佢買股票賺咗大嚿錢，十幾年前只係俾一成首期，佢又買埋半山士多啤梨山獨立屋，五千幾萬買，升咗成倍一億都唔放，而家個價已經去到兩億。連埋加列山道賣咗四億幾間獨立屋，手上有七億幾資產。
「佢成日話自己好彩，撞正香港市道好賺到錢，其實未同何生一齊時，已經有成億樓喺手，不過佢好低調，好少同人講啫。」知情者說。
撰文、攝影、攝錄：娛樂組
|
鍾意就快D Share啦！
|
|
|