掃呢頁CODE去手機

2017年1月26日 星期四

廢柴有希望 [壹週刊 - 1403] __,M1,

坦白講廢柴有希望被丟棄的廢木,一無是處,卻遇上了「伯樂」封曉彤。視廢木為寶的她,學木工助它們起死回生。這堆廢柴,就如她的寫照。當日滿懷熱誠進入職場,最終不滿官僚制度而裸辭,成為大眾眼中捱不到苦的九十後,不努力向上爬的的廢青。她懶理別人看法,能從修補廢木廢柴中找到自我價值,不認廢。九十後經歷雨傘運動,對社會及自己前途都有好重嘅無力感,畢業就係迷失嘅開始。我第一份工入咗大型社福機構,滿腔熱誠服務社會, ...


坦白講

廢柴有希望

被丟棄的廢木,一無是處,卻遇上了「伯樂」封曉彤。視廢木為寶的她,學木工助它們起死回生。這堆廢柴,就如她的寫照。當日滿懷熱誠進入職場,最終不滿官僚制度而裸辭,成為大眾眼中捱不到苦的九十後,不努力向上爬的的廢青。她懶理別人看法,能從修補廢木廢柴中找到自我價值,不認廢。

九十後經歷雨傘運動,對社會及自己前途都有好重嘅無力感,畢業就係迷失嘅開始。我第一份工入咗大型社福機構,滿腔熱誠服務社會,點知自己只係齒輪入面一粒小螺絲,咩都做唔到。

我讀文化研究,想舉辦文化導賞活動,帶小朋友認識香港歷史,自己帶團,收費便宜。只因無證書,文化活動喺上司眼中無價值,一句:「唔得!」所有心機白費,只可繼續搞鋼琴、芭蕾舞等賺錢,受怪獸家長歡迎嘅熱門班。呢啲班周街都係,點解唔可以俾我發揮少少創意?去社區中心唔係受難,而係啟發小朋友成長。我都係咁長大,更加唔想成為幫兇。

份工令我完全無咗自己思想,工時長又無意義,就算我完成晒工作,都要坐到夠鐘先可以收工。做咗半年我就裸辭,轉做 freelance,終於有番自己嘅空間。當時咁啱想要一個書架,去宜家家居睇唔啱,心諗點解唔自己整?結果我喺街邊垃圾站執咗個櫃,鬆咗啲螺絲,抽走木板,抹乾淨,裁啱尺寸,搞掂!

我住天水圍,而家每逢假日都踩住我心愛嘅古典單車入村搵廢木,通常村口、垃圾房和公園都有好多。搵到靚木,我會用一個日本古老方法:火燒,所有毛躁及切口位一燒就無,跟住用刷打磨,然後沖水,令木平滑,重現木紋和年輪。可惜香港政府處理樹木手法好差,只要文件上嘅期限一到,唔理棵樹實際健康情況,斬咗先講,結果一大堆又靚又新鮮嘅木材被送去堆填區。

起初我拎起鋸刀,嘩!真係好重,姿勢、力度都唔啱,成日被木刺到,損傷污糟實有。不過見到製成品,滿足感好大,環保之餘有個性,有感情。唔只木工,車螺絲、燒焊、機器等我都想學,好多嘢可以自己做番,幫到朋友,同時亦鼓勵佢哋學,其實無想像中咁難!我依家一方面做藝術行政,彈性上班時間,搵到適合我嘅工作模式,一放假就開班教人燒木,做木工義工,絕對唔廢。

撰文:關卓凌

攝錄:葉漢華


鍾意就快D Share啦!