葉佩雯怪病復發翻脹手指蘿蔔咁腫
前歌手葉佩雯（Grace）年多前自爆患怪病令體重不停飆升，其後病況一度受控回復苗條，惟日前她在老公陪同下現身中環，身形明顯再度翻脹，手指亦腫到如小蘿蔔。對此Grace坦認飽受病患困擾，性格樂觀的她沒有失掉鬥志，更以自身例子呼籲大家注重健康，鼓勵病患者要以開心、正面態度面對逆境，對抗病魔。
不久前Grace和著名音樂人老公郭偉亮（Eric Kwok）往北海道滑雪，期間老公受傷一度動彈不得，經過個多星期休養，Eric火速傷愈，大前日駕車與愛妻Grace及家中兩隻寶貝愛犬出街。當日下午4時多，抵達中環後一身潮人打扮的Grace落車，雖然穿上厚厚大衣，但亦難掩腫脹不少的身形，十隻白雪雪的手指更腫到如同小蘿蔔，只見她慢步行去遍布診所的商業大廈。
賀爾蒙分泌「彎」咗難醫
其實，早於年多前Grace曾自爆體重短時間狂飆升兼左邊頸腫凸起來，當時遍尋不少中西名醫，又照超聲波、又去腫瘤科檢查，均找不出病因，後來經中醫調理控制病情，體重亦慢慢回落。去年1月，Grace染上粉紅頭髮拍照上載社交網，明顯瘦了不少，至6月和老公放狗仍然面尖尖。如今身體又再翻脹，未知是否健康又響起警號？記者就此致電葉佩雯，她輕鬆地坦認病發，笑說：「上年到依家都睇緊醫生，唔使擔心，冇辦法啦，上咗年紀係咁！」
問到病況？Grace直言受到纏擾，一度氣餒，她說：「因為呢個病，唔可以接啲好辛苦嘅工作，又唔可以捱夜，一路要Keep住調理，身體時好時壞，成日都要食住藥，中西醫都有睇，醫生話因為賀爾蒙問題就算減肥都減唔到。」
雖然受病患影響，Grace心情依然開朗，講笑說自己並不是懷孕，並以自己的遭遇鼓勵病者要開心、正面去面對：「正面心態好緊要，如果因為磅數、肥腫影響心情而唔去食嘢，咁身體仲差，好似醫生講要接受囉，用一個正面方法去解決去醫，所以我依家係肥得嚟好開心。」Grace呼籲大家要注意健康：「尤其女士真係要注意，賀爾蒙分泌嗰樣嘢一旦『彎』咗就好難醫得好晒，所以大家都要小心身體。（你個病會唔會影響生育？）我都唔想多講。」
Eric鍾意老婆有肉
至於Eric受訪時感謝大家關心太太Grace，笑說老婆心情好好，自己也不覺得她肥，因為本身鍾意女仔有肉：「身體唔好真係好麻煩，好似我依家咁手腳受傷，仲要做物理治療。」他透露當日是載Grace往睇醫生，因為滑雪時扭傷手指，笑對方手指一向粗，和他差不多，所以好有福氣，更說：「我應承咗畀幸福佢嘛！」隔空送冧。
文、攝：追蹤組
|
鍾意就快D Share啦！
|
|
|