探熱針
馬爾代夫返港 杏兒生夠三個先收手
恨 B恨到出晒口的胡杏兒，結婚年半終於成功造人，在母親節當日宣布做媽咪，慶祝佗 B，上星期杏兒同老公 Philip飛馬爾代夫「 baby moon」。
週日（廿一日）早上，李生李太返港，佗 B四個月的杏兒著住牛仔衫褲，已經開始見肚，而且略為發福， Philip推住行李出閘，摩打腳行得勁快，大肚婆急步尾隨，真係睇見都牙煙！
據知，身為長子的 Philip肩負傳宗接代責任，兩公婆目標一致，生夠三個先收手，今年三十有七的杏兒，真係要快馬加鞭
生得幾多得幾多
杏兒結婚當日在「李家祠堂」對住鄉親父老曾戲言「一年抱三」，這個目標當然唔會輕易做到，不過婚後杏兒同 Philip開行 turbo，終於成功製造第一 B，母親節當日，杏兒在 ig上載 BB的超聲波相報喜：「今年的母親節太特別了，感恩上天送給我們的禮物，感覺好奇妙，李寶寶已急不及待在我肚子裡做仰臥起坐了，寶寶再等一下，爸爸和媽媽期待跟你見面呢！」
「其實杏兒 target要生三個，仔女都冇所謂，佢同 Philip都好鍾意小朋友，契仔契女都一大堆，不過始終唔想做高齡產婦，總之盡量生，生得幾多得幾多啦。」胡杏兒身邊人說。
首次做媽咪，杏兒卻表現輕鬆，懷孕初期已經搭長途機，前排孖住老公飛馬爾代夫「 baby moon」，同陽光玩遊戲，杏兒更開心 share比堅尼相。相中的杏兒依然弗到漏，正面睇完全唔見肚，一啲都唔似大肚婆，連粉絲都留言叫佢「辣媽」。
「胡說八道」多喜事
由胡定欣、胡蓓蔚、李施嬅、黃智雯、姚子羚同埋胡杏兒組成的「胡說八道會」，最近喜事一浪接一浪，先有杏兒榮升媽咪，之後黃智雯同姚子羚雙雙被傳好事近。
行動靈活
週日（廿一日）早上八點，杏兒同 Philip返港，出閘時粗重嘢當然由 Philip負責，他拉住兩大喼一馬當先，杏兒兩手 fing fing尾隨，著住牛仔外套加闊褲的杏兒，明顯同比堅尼相有出入，明顯增磅兼開始見肚，不過精神飽滿，而且行動非常快速，佗 B四個月杏兒完全冇就住，一出閘 Philip keep住摩打腳，杏兒急步跟住，行行吓 Philip見唔對路，先停一停等埋老婆，兩公婆去到停車場，急急上車走人。
奶奶谷肥
話晒 Philip係李家長子，佗住長子嫡孫的杏兒深得奶奶痛錫，為咗令新抱達標生夠三個， Philip媽全天候掌控杏兒起居飲食，務求谷肥新抱。
「杏兒奶奶成日話佢太瘦，所以煲好多湯水俾佢飲，等佢長多啲肉，又唔俾佢食隔夜嘢，湯水同餸菜都要日日新鮮整，連 Philip都話佢媽咪錫杏兒多過錫佢。」胡杏兒身邊人說。
撰文、攝影、攝錄：娛樂組
|
鍾意就快D Share啦！
|
|
|