今年51歲郭富城，上個月同29歲女友方媛(Moka)喺半島結婚，一直有傳Moka陀B，而即將榮升做爸爸嘅佢，就有傳已經book定養和頭等房，等老婆分娩時入住。加埋之前買落嘅3千豪宅，城城對老婆仔都算大手筆。(新聞連結：http://bit.ly/2rdMuLg )啱啱同Moka新婚，加上老婆陀緊B，嚟緊去加拿大拍戲嘅城城，有一大段時間見唔到老婆，咁對老婆好當然理所當然。之但係，今日係母親節，主角，就梗係自己位娘親。今日下晝約5點，《蘋果》見到城城拖實方媛到中環置地名店Tod's舖頭，出名孝順嘅城城，見到在場記者，就好奇問點解咁多人，然後就笑笑口話：「今日帶老婆落嚟揀母親節禮物。」記者問城城今日母親節會買咩送俾媽咪，城城就話：「咪就係要揀囉！」行行吓城城停低望望上面嗰層，有記者打趣話：「你要去邊呀？我哋話俾你聽」記者繼續追問母親節點慶祝，有記者問會唔會親自下廚俾媽咪？城城就話：「唔會，我哋出去食飯。費事煮，媽咪年紀大。」仲表示頭先同Moka撐完枱腳，然後就匆匆行入鋪頭。
之後就施施然拖住老婆入舖頭。見城城喺舖頭揀母親節禮物時，一直拖實老婆，好細心喺舖頭左揀右揀，至於今日着住裙同T裇嘅方媛，側身睇，腹部已微微隆起，孕味極濃。除咗揀母親節禮物，城嫂Moka仲喺舖頭不停試鞋，試鞋期間，仲不時叫老公俾意見。現場所見，城城主力睇袋，喺舖頭睇咗10幾個袋，而Moka就專攻鞋，試咗近10對鞋。二人喺舖頭逗留個半鐘，最後掃咗三大袋戰利品，轉戰商場另一問專賣鞋嘅名店。
| (採訪、攝影：畢紹基) | | |
| | | |
| |
|
鍾意就快D Share啦！
|
|
|