Sam貓王護體處處吻 阿倫睇中蘇屋邨飛女
樂壇兩大歌神許冠傑與譚詠麟開騷，除了唱盡金曲外，最令人期待的當然就是掀起高潮的錫錫環節！阿Sam無懼流感肆虐，化身「貓王」與嘉賓及在場女歌迷錫錫，阿倫則邀請「蘇屋邨飛女」上台交流！
歌神許冠傑（阿Sam）與樂壇校長譚詠麟（阿倫），前晚在紅館舉行由藝能製作主辦、一連12場《阿SAM & 阿TAM HAPPY TOGETHER演唱會》頭場，演出期間，兩人各自手持玫瑰花落台挑選女歌迷上台，阿Sam將花送給英皇歌手陳凱彤，並拖她上台跳舞兼錫嘴邊，阿倫則選了一位婆婆上台。婆婆表示在蘇屋邨長大，曾是蘇屋邨街坊的阿Sam聞言說：「我嗰時係好出名嘅『飛仔』嚟！」婆婆亦笑說：「我係『飛女』！」來到錫錫環節，早前呼籲歌迷帶醫生入場證明冇流感的阿倫笑說：「今次連醫生都帶埋嚟，我知道醫生紙都好多，但依家流感太犀利，避免交叉感染，暫時唔錫嘴住！」阿Sam則與女歌迷錫面。
校長發明歌詞機？
其後現場播出阿Sam大談阿倫的片段，期間邊講邊唱，阿Sam暗示阿倫經常忘記歌詞，又唔認老：「聽講紅館嘅歌詞機係阿倫發明，但我就唔知有幾多成真不過佢仲有樣嘢就係『明明係老，佢話唔係』，仲話自己25歲！」全場爆笑！去到中段，談到阿Sam於1986年因拍戲患上高山症，當時還未康復的阿Sam卻堅持出席作品展，阿倫感觸落淚，哽咽說：「我同Michael（許冠文）兩行眼淚，阿Sam唔止係我偶像，係代表我哋香港人！阿Sam唔會就咁樣，冇耐之後就出番嚟唱，唱到依家！」他之後請出李香凝上台合唱紀念其亡父李小龍，李香凝落台後，阿倫及阿Sam向一班已故歌手致敬，並獻唱陳百強的《一生何求》。Encore環節，阿Sam揚言要唱到80歲，演唱會於11時59分結束。
熱情歌迷抓傷手背
阿倫完騷後受訪時，透露落台握手時被歌迷捉得太緊，右手手背不慎受傷。問到是否擔心染流感，所以不與歌迷咀嘴？他笑說：「錫完之後有菌帶畀第二個咪唔好囉！」阿Sam則冇有怕，指美國已故搖滾巨星「貓王」皮禮士利（Elvis Presley）亦喜歡錫歌迷，在旁的阿倫即開玩笑：「佢有貓王抗體！」提到演唱會超時，阿倫笑說：「大鑊喇！每5分鐘就罰唔知幾多倍。」講到在台上一度感觸落淚，他直言守了秘密很久，希望阿Sam不要介意，阿Sam則笑言幸好當時撐住：「終於唔死得！（你爆阿倫唔認老？ ）最緊要啲觀眾笑啫！」
文：音樂組
攝：黎志輝
|
鍾意就快D Share啦！
|
|
|
