探熱針
傳加碼 10萬受訓直入《中國新歌聲》 龐景峰認去到一半唔玩
前身是《中國好聲音》的內地唱歌比賽《中國新歌聲》，由於參加過比賽的歌手，不單有機會出唱片，更可以學員身份在全國做騷賺人仔，不少有知名度的香港歌手都願意放下身段參加比賽。
據了解，以歌手身份入行的龐景峰，原來五月經中介人到上海接受訓練，一直以為俾足十萬就可以直入比賽，其後再被要求加碼到二十萬才有「資格」入圍，他隨即放棄唔玩。雖然否認有俾錢，但承認訓練到一半就走人。
廿萬先入圍
前兩年以《中國好聲音》播出街時，在香港出過唱片，有唔少 hit歌的李幸倪、巨聲幫鄧小巧和男子組合 KillerSoap主音陳樂基都先後參加過比賽。
據了解，曾經在韓國接受歌手訓練，一五年跟當地歌手朴嘉熙合唱出過歌的龐景峰，年中經一間內地中介公司搭路，指報名接受一個十萬元的培訓課程，便可以直入《中國好歌聲》比賽，且好大機會被選中進入其中一個導師團隊。因為簽了保密協議，故龐景峰未有向任何人透露，但期間忍唔住在訪問中開心 share，表示即將有大單嘢發生在自己身上。
「 Andrew（龐景峰）私下同 agent傾好晒，之後先叫經理人去睇合約，但就從來冇話俾公司知要俾十萬蚊，因為合約冇寫，公司都以為唔需要任何費用。之後間 agent又要攞多十萬，件事冚唔住，經理人公司同媽咪都知道， Andrew先放棄返香港。」知情者說。
受訓一星期
對於參加培訓，龐景峰承認確有其事，但堅稱冇俾過錢，他解釋唔玩原因：「係公司幫我安排一切，我冇俾過錢，唔清楚，你喺邊度聽返嚟！因為公司開咗部《竊密者》，我要返嚟開工，所以訓練咗一星期就中途退出。始終我都想 concentrate番做武打演員呢樣嘢！」
八強止步
曾經參加《中國好聲音》的香港歌手，有實力甚至有一定知名度，不過最好成績的李幸倪，都不過是八強止步。
撰文、攝影、攝錄：娛樂組
來源 source: http://hk.next.nextmedia.com
|
鍾意就快D Share啦！
|
|
|
