位於巴域街嘅唐樓，一半單位已被拆窗。
八卦陣
舊區收樓奇招──拆窗
市建局最近喺土瓜灣嘅重建項目，終於向業主發出收購建議，《壹》仔聽聞「收樓專家」田生地產同時都有向呢班業主埋手。睇番田生網頁，佢哋收購緊或成功收購嘅項目，加加埋埋有五十五個，當中唔少項目仲係一次過收幾幢樓。
《壹》仔去睇過田生收返嚟嘅樓，發現部分未成功收購或者等緊重建嘅唐樓，被人拆晒窗。例如超過六十年樓齡嘅長沙灣永隆街十一號，附近街坊話有人偷走晒啲窗，令「騎樓」位日曬雨淋，仲不時有陌生人上樓過夜。單位入面嘅情況真係幾差㗎，抬頭就見到生銹鋼筋、布滿青苔或者石屎剝落嘅天花，地下就有積水。
香港測量師學會前會長何鉅業話，雖然建築物唔會有即時倒塌危險，但雨水同潮濕天氣令到鋼筋生銹，對結構造成風險，「如果佢長時間潮濕同有水滲入去地板、橫樑等，令到入面嘅鋼筋持續生銹，導致石屎剝落，就會影響結構嘅穩固性。」唐樓嘅「騎樓」部分就更危險，因為「露台下面無柱嘅支撐，只係靠橫樑。」如果長時間缺乏維修，就有可能導致倒塌。
田生回應話需時查核，暫時未能提供資料。
官籲袁國強守護竹林禪院
《壹》仔早前報導，懷疑有人圖謀荃灣芙蓉山竹林禪院內，價值十幾億嘅骨灰龕位，搞到寺廟烏煙瘴氣。其實較早前，已經有其他廟宇僧人入稟法庭，要求律政司同民政事務局局長介入管理禪院。
上星期法庭頒布入稟狀判詞，認為律政司身為慈善基金嘅守護者，應該跟進禪院幾項問題。例如慈善組織歡喜心慈善會有限公司同竹林禪院無關，但就以竹林禪院做會址；曾經有十幾名黑衣大漢喺禪院出現，阻止僧侶同信眾入內，又阻止管理成員召開管理會議，怕有人想謀奪一筆九千萬嘅基金；以及有內地僧侶騷擾老和尚屋企人等。
竹林禪院創辦人融秋和尚孫女龐孟婷同《壹》仔講，對於法庭嘅呼籲覺得好開心，希望當局能夠徹查法官所提到嘅種種問題，重組負責管理竹林禪院嘅曼華堂，令禪院可以盡快重回正軌，繼續幫助老弱貧窮，「而做壞事嘅惡人，應該受到應有懲罰。」另外，亦有其他寺廟嘅僧人，覺得今次法庭判詞好正面，認為律政司介入，可以解決竹林禪院嘅紛爭。
李梓敬加入「港獨」標語大戰
大專民主牆「港獨」同「反港獨」標語大戰，由中大燒到其他院校。九月起喺城大讀法律博士（ JD）課程嘅自由黨李梓敬都參戰，上星期五喺城大獻出第一次，貼「香港是中國的一部份」標語。佢跟足規矩喺標語度寫上姓名、張貼日期同學生編號，仲貼到民主牆最底部，話唔遮住人哋嘅嘢喎。
李梓敬喺 Fb live話民主牆應該容納唔同聲音，「唔係話你學生會就大晒。」《壹》仔問佢覺得學生會點大晒法，佢講番有大陸學生撕走中大民主牆嘅港獨標語，俾學生會成員阻止，第二日再有人貼標語上去，又有人話唔可以貼喺其標語上面，質疑準則喺邊。講到咁複雜，其實《壹》仔覺得，準則都係標語唔會被隨便撕走或者遮住啫。
佢又投訴自己嘅標語第二日已被撕走，部分新貼上去嘅標語冇寫學生編號、張貼日期等，話如果貼標語嘅人公民抗命、唔怕違憲，應該提供番呢啲資料，有人捉佢哋就捉咁話。不過憲制文件係用嚟約束政府，一般市民講嘅嘢牴觸《基本法》，又會有咩法律後果？唔知佢老師梁美芬有冇「答案」呢？
民主牆風波教大學生有話兒
教育大學呢排成為全城焦點，皆因佢個民主牆不停俾人貼完又貼，先出現奚落教育局副局長蔡若蓮喪子嘅字句，再出現冒犯已故諾貝爾和平獎得主劉曉波同遺孀劉霞嘅標語。再貼標語嘅人認真高招，考驗校長有冇大細超。
誰不知，正中下懷。坊間批評教大校長張仁良，對兩件事抱唔同態度，係雙重標準。教大同學 Joshua就話：「我認為做嘅人行為（道德上）當然唔恰當，但校長嘅反應亦未免太大，喺兩件事上，校長嘅回應好唔同，處事不公。」對於民主牆應該點用， Joshua認為：「大學係有言論自由嘅地方，每個人都有自己意見，人哋點睇係另一件事。」
同學 Zac就話民主牆係學生發表意見嘅地方，但同學都要自我監控。佢認為校長喺兩件事處理上不一，「係雙重標準，一定同政治有關，而且我都唔贊成學校查閉路電視。」
內地生劉同學就覺得肇事者行為不當，「太過分，太偏激，講嘢都要有規矩，唔係咩都可以講。」佢仲話呢啲人唔符合正常嘅道德，好傷人心喎。雖然至今仲未查出到底邊個係真兇，但教大嘅同學仔當然唔願意相信「兇手」係自己人啦。
撰文：巫不言
news@nextdigital.com.hk
|
鍾意就快D Share啦！
|
|
|
