探熱針
搬回家療傷 陳貝兒等下一春：繼續相信愛情
驚爆去年結束六年婚姻，難怪陳貝兒拍《嫁到這世界邊端》感觸喊唔停。分居初期晚晚以淚洗面，父母太擔心，勒令她搬回家療傷。經過差不多一年，終於接受離婚事實，重新上市的她仍然有勇氣等待下一春，語氣肯定地說：「繼續相信愛情！」
晚晚爆喊
三十八歲陳貝兒與物流業商人老公黃國棟離婚，難怪在大台節目《嫁到這世界邊端》中頻頻落淚，她坦言冇人結婚會想離婚，更感觸謂：「依家我係生係死都冇人理，我都離咗婚。」
據悉二人去年分居，現正辦理離婚手續，陳貝兒一度大受打擊，避不見人，幸好有好友及父母支持，已經走過情緒低谷。
「當時 Janis成日喊，佢父母梗係擔心啦，所以叫佢搬返屋企住，可以睇住同照顧佢。不過 Janis同老公係和平分開，再見亦是朋友，大家都仲有見面。」知情人說。
譚校長關心：唔好飲咁多酒
日前陳貝兒夜半在 facebook，面紅紅、似有醉意開 live談拍《嫁到這世界邊端》點滴，一講就講咗三粒鐘，其間播情歌更一度感觸說不下去，睇住她長大的 Uncle Tam譚校長留言鼓勵，更叫她不要飲那麼多酒。
不會放棄
雖然婚姻失敗，但沒影響陳貝兒對感情的信心，據悉她在《嫁到這世界邊端》最後一集說：「原來唔係個個人咁好彩，可以同身邊另一半行到老，不過我唔會放棄，會繼續相信愛情。」
日前她跟好友歎下午茶，全程有講有笑，似乎已收拾心情。談到花了多久才復元，她說：「都要過咗一段時間，依家已經七七八八，好在有好姊妹陪吓。」問到當時是否不想見人？她指着身邊友人說：「好在有佢哋，我哋姊妹淘！」家人曾擔心她做傻事？她笑說：「佢哋知我性格係唔會，我大情大性，有時唔開心會喊，喊完就冇事，佢哋見慣我喊，抒發咗就冇事。」
撰文、攝影、攝錄：娛樂組
來源 source: http://hk.next.nextmedia.com
|
鍾意就快D Share啦！
|
|
|
