Frank在日本生活了十七年，坦言沒有回流香港發展的打算：「返到嚟都好難搵工，最多都只係從事日文相關工作。」
壹號專題
過來人剖白 移民的另一面真相
香港樓價高企、市民充滿戾氣，香港人壓力「爆煲」，有無解決方法？左邊范徐麗泰一句：「對共產黨無信心請離開香港。」右邊林奮強一句：「唔好喺香港住囉。」原來香港不再屬於香港人。
本刊採訪多個「離開香港」多年的例子，發掘移民真相。有移居日本港人在當地打工，坦言無論在外資機構還是日本機構，港人都如「二等公民」；紐西蘭環境清幽，但交通與樓價一樣貴；因網誌「爵爵&貓叔」而在網上冒起的港人貓叔，其 café在台灣開店不夠一年，已經頻頻叫苦：「嚟台灣創業？咪玩」經營移民事業多年的關景鴻，指各國移民門檻，因內地人需求大而愈來愈高：「搞移民嘅十個有八個都係內地人，唔會避得開，睇吓你要求存、定係求理想。」
日本篇 女人婚後性情大變
香港人愛去日本旅行，但真正住落感受如何？移居日本的港人黃海帆（ Frank），於二千年被公司調派到東京從事 IT工作，在當地先後轉了三次工，一做便十七年，對當地「真相」十分了解。
訪問當日，正值 Frank回港度暑假的最後一日：「公司除咗公眾假期，每年都會額外有十日暑假，聖誕都有。」對於日本企業根深柢固的「無限期 OT」、甚至過勞致死的現象，他坦言不少企業都已願意改變：「好似我呢家公司，有個政策就係超時工作到夜晚八點就要事先申請，做足手續上嘅嘢。」
日本工作難升職
他甚至說：「如果你想 hea啲嘅話，其實係幾適合去日本做嘢！」他的回答令記者嘩然，因為日本工作出名壓力大，似乎與想像有很大落差，他解釋：「香港人喺香港可以好進取，好快上位；但香港人去到日本，即使進取都無用。因為喺外資機構，機會都俾晒外國人，至於日資機構就更加難上位，因為有咁多日本人要同佢哋爭。」源於外國人關係， hea唔 hea都一樣難升職！
而且，港人轉工普遍都是加薪，但在日本就相反：「我喺香港（薪金）每年加百分之五至十，轉工嘅話加百分之十五至二十係正常。但喺日本，轉工嘅人工通常係會跌。」他解釋，因當地多年幾乎沒有通脹，「轉工」對當地人來說印象負面：「嗰度大部分人一世只係做一間公司。最多只會調去唔同地區，人工每年加百分之二已經係好多。我轉這份工時， HR會問我，點解你喺香港轉工咁密，我唯一可以答就係香港文化。」
幻想破滅
在日本工作，除了面對凍薪問題外，還有各種各樣的稅項：「第一個就係入息稅，人工愈多抽嘅百分比愈高，第二就係住民稅，第三個就係國民保險，類似香港醫保，嗰邊係員工同公司都要俾，另外就係失業救濟金，仲有年金，類似香港 MPF。」他指，每月人工被抽約百分之十至二十五在稅項上。問到外國人的福利能否與當地人看齊，他就指：「除咗選舉權，基本上係一樣。」
香港男人憧憬日本女子任勞任怨， Frank稱沒有追求當地女子，事關他與在港拍拖多年的女友一同前往日本，但從同事間得悉日女沒有港男幻想般好：「拍拖都係男嘅俾錢多；結了婚之後，就係太太去俾，不過原因只係丈夫所有錢都要交俾太太管理！男嘅就只會每個月收零用錢。日本女仔結婚之後多數會辭職，專注家庭上。」他聽過不少同事抱怨，太太婚後性格大變：「可能未結婚時，佢哋唔會使咁多，最多花喺衣服上。但結咗婚後，兩三個日本太太就會一齊去食法國大餐！我返工每日一杯 Starbucks，都俾男同事講：『你好豪爽！』」至於日女對港男的看法，他直指：「國籍對佢哋嚟講，唔係太睇好或唔睇好，但談婚論嫁嘅話，日本女子都係鍾意歐美男士多啲！」
日本今年初實施新移民措施，投資五百萬日圓（約三十五萬港元）到日本開公司做生意，即可申請經營管理簽證。 Frank暫時亦沒有想過回流：「喺日本經歷咗金融海嘯，有段時間無做嘢，所以到現時先申請到永住權。香港模式一直喺度變，我相信唔太睇重廣東話同英文，反而會日漸睇重國語……我發覺我可能唔適合香港。」
紐西蘭篇 交通樓價一樣癲
Roxie指，紐西蘭的生活節奏是她決定到當地生活的原因：「呢度起碼落後香港三年，好似瑞士卷咁，香港有唔同味好 common，但係當地人見到唔係原味就好驚訝，我都唔知俾咩反應好，但我就係鍾意呢種生活，香港的生活節奏真係太急促啦。」
在傳媒任職多年的 Roxie，辭職後往澳洲工作假期，後到鄰國紐西蘭旅行認識了移民當地的港人 Johnny，成為情侶。三年前在 Johnny的要求下決定到當地定居，今年更成功拿到了居留權，正式成為紐西蘭人。
Roxie與 Johnny並沒有結婚，二人至今只是 partner（伴侶）關係：「呢度睇婚姻好輕，好多小朋友父母都未結婚！」她解釋，若未婚伴侶的非原居民想拿到居留權的話，就需要向移民官展示一系列證據。其間她曾與 Johnny分開生活一個月，於是要拿出證據，向移民官證明如何維持關係：「我哋要搵番啲對話 cap圖，中英文都有。又要搵朋友寫信去證實我哋關係。」二人未婚，移民官審核時相當謹慎：「起碼要同居咗一年以上，要四個月時間申請。」她補充同性伴侶都可申請，而成功申請後分手，居民身份都可獲得保留。
通水喉通到買遊艇
她補充指，大多港人透過技術移民當地。除了傳統的專業技術之外，當地有不少職業都十分吃香：「好似油漆工、園藝、裝修同水電，喺呢度發展都好好。我認識一個水喉匠，一個鐘收成五、六百蚊港紙，做到可以有兩隻遊艇！同埋廚師係長期短缺，如果做過廚都可以諗諗。」
說到平日工作，紐西蘭人工其實比香港略低，每天工作八至九小時：「正常 office工，都係萬零蚊港紙，但一星期只返五日。」在港工作多年的她深感這裡壓力輕得多：「呢度啲人重視家庭多過份工，好少人諗要點上位，情願早啲返屋企。同埋好少臨收工先俾嘢你做，我試過 send電郵出去，對方星期四收到，最快下星期二先會覆。」
不過紐西蘭一樣面對兩大問題：交通及樓價。 Roxie坦言：「全球最難負擔樓價排行榜，香港梗係長期第一，但其實紐西蘭都係頭幾名，其中一個原因就係中國人投資移民，佢哋有錢，一千幾百萬，做個生意，或者買地。你知啦，佢哋買屋都唔係住，係炒㗎嘛！」幸好她現時與 Johnny住在奧克蘭市中心外圍，高樓價暫未波及該區，三房兩廳連花園二千多呎，租金大約一萬多港元。但就要面對另一問題：「呢度好塞車！公路同紅隧差唔多，又無地鐵，火車、的士都好貴，無車好似跛咁！好彩呢度興彈性 working hour同 home office，返工先可以避開繁忙時間。」
台灣篇 創業慘過打工
於香港工作的台灣人爵爵，與港人貓叔，合作了「爵爵＆貓叔」 Facebook專頁，更曾推出三本漫畫。上年他們在高雄開設 café，貓叔在訪問中直指，不少港人心目中的「台灣夢」，並沒有想像中簡單。
做過一年廚房佬的貓叔，指香港人什麼都講求效率，見有事發生就立即去解決。但台灣人相反：「如果我企喺台灣人立場嚟睇，就會覺得香港人係癲嘅！因為時時刻刻都係做緊嘢，或者同時間做好多樣嘢，佢哋覺得有無搞錯！」貓叔續指：「好似之前有枱客，會影吓相、叉吓電、傾吓偈，六點坐到十點。喺香港……店主可能會覺得困擾。」
台灣人興方便當隨便
現時貓叔及爵爵的 café共有兩層，二樓用作員工宿舍之用，他直言台灣包住的餐廳甚少：「呢度其實都幾難生活，最低工資港幣三十零蚊。但屋租差唔多一萬台幣（約二千六百港元），計埋生活開支等，每個月得番一萬台幣左右，要儲錢其實好難，我就當包住係一種福利！」
「呢度有句說話，叫做『方便當隨便』，簡單嚟講即係得寸進尺。當你同佢哋熟咗，佢哋會覺得好多嘢都係理所當然。好似 café生意唔太好，但佢哋覺得每日做九百蚊台幣（約二百三十四港元）生意已經 OK。好似我話返工用手機都可以，咁佢哋由返工到收工都喺度用……」
「嚟台灣創業？咪玩」
有港人夢想來台生活，貓叔直指：「咪玩比較香港，台灣梗係比較適合人住，衣食住行都平啲。最好就係香港打工，台灣生活，但梗係唔係諗得咁好！」他解釋：「好多香港人嚟到都話想過嚟住，我會同佢哋講，除非你唔使養父母，又或者本身好有錢，如果你嚟呢度想搵份工生活，真係咪玩我認識好多人過到嚟都搵唔夠錢使！」不打工，創業較好？貓叔搶答：「都咪玩我自己都搞唔掂呀！呢度 café競爭已經唔算大，人流已叫多，但客人都唔夠！」他向記者透露，現時 café每個月都在賺蝕之間：「無喺香港咁誇張，賺蝕每個月都係千幾港紙，但係自己都未出到糧。」港人夢想到台灣開 café？他再勸一句：「除非你好有錢，可以喺商場開，如果唔係，小本生意真係唔好諗！」
避不開的內地人
經常在電視見到的移民公司老闆關景鴻，坦言因需求急增，多國都不斷提高移民門檻，港人想移居理想國度並非易事，而主因就是內地人。他們對移民需求大增，關景鴻舉例指，英國投資移民最少要有二百萬英鎊（約二千零五十九萬港元），普通人根本負擔不起：「就算用技術移民，門檻同以前完全唔同，以往你達到要求，已經可以接受申請，而家唔係。以前大學畢業生，英文無問題，有三四年工作經驗都已經可以考慮，但係而家喺全球排位上，可能第三第四輪都未輪到佢哋。」
英語國家門檻普遍大幅提高，造就地中海小國馬爾他，成為熱門的移民選擇。由於當地英語為官方語言，加上投資二十五萬歐元（約二百三十四萬港元），就可以申請到四代移民。但關指已有不少內地人申請：「有幾十個內地家庭申請緊。」
港人移民主因，不外乎經濟及政治因素，不少人深感內地人「溝淡」港人，不滿大陸化而出走。但關坦言，就算到外國，都難免與中國人一起生活，甚至合作做生意。他直指，現時海外華人比較多的地方，按比例計，香港人愈來愈少：「溫哥華講廣東話比例仲好啲，但你去到多倫多、悉尼、墨爾本，十個中國人，以我哋計，有八個都係講國語，所以移民與否，睇吓你要求生存定係求理想。」他亦指不少外國人根本不懂分辨香港人及中國人：「佢哋只會認為黃皮膚嘅人好識做生意！」
撰文：梁延宇
攝影：財經組
news@nextdigital.com.hk
|
鍾意就快D Share啦！
|
|
|
