戴耀明膽粗粗向阿佘表白，就算明知綠葉追女一機會渺茫，嘗試爭取已不枉此生。
探熱針
借醉向佘詩曼示愛 動 L戴耀明內地做男一 呢個回憶要鎖喺夾萬
去年在《 EU超時任務》一幕離奇「動 L」，令網民 like爆的大台綠葉王戴耀明，入行捱了廿五年，今年初終於在內地網大電影做男一，初嘗有助手，有專車服侍，人前人後被尊稱「老師」的滋味。
綠葉變男一，戴耀明亦曾經越級挑戰，借醉向女神佘詩曼示愛。工作愛情都一樣，肯搏，就有機會上！
男一之作國內版阿旺
一個流水作業式的電視台，綠葉可能一世都只是綠葉。近年內地網大興起，成為香港一眾綠葉演員的曙光。一直在大台穩守配角的戴耀明，等了廿五年，今年終於等到，成為愛奇藝網絡電影《爆裂老婆三歲夫》的男主角，不枉在大台磨利「御用傻仔」的一張刀。
被選中做男一，當日戴耀明既驚且喜同時，亦不禁第一時間問對方：「點解揀我？」
「佢哋都好坦白，話套戲成本唔係高，所以要搵一個大家稍為認得吓，有歸屬感嘅演員做男一。個角色似郭晉安嘅《阿旺》，當然我有信心，唔會做得差過安仔。」
向阿佘示愛：「我好掛住你！」
還了當男一心願， 45歲的戴耀明，說自己尚有另一個一世無法達成的夢想。「我成日同阿佘講，我搵到錢會娶你做老婆。」
戴耀明表面說笑，實質他認真行動。二人在 04年《金枝慾孽》結緣成為好友，從此「小禮子」戴耀明暗戀「主子」阿佘。追求兩字對他而言雖是「希望工程」，但某年仍膽粗粗，抱住失敗是正常，成功屬 bonus的心態，決定一次越級挑戰，借醉向阿佘示愛。
「佢係女一，邊敢溝佢。不過有次飲醉咗少少，咪 send個 WhatsApp同佢講，我好掛住佢。佢回覆嘅反應係：『吓！我依家喺內地開緊工，你搞緊咩呀？』之後我有同佢 say sorry。佢請我食檸檬係正常啦，不過一次半次表白吓，唔會反面嘅。」
咁又係，自古成功需嘗試，唔試又點知有冇奇跡發生。「追唔到佢，不過都希望將來可以有套劇同佢合作，戲裡佢錫吓我面豬，有啲 sweet畫面，俾我留為紀念。」
女友貧富懸殊
其實戴耀明有個拍拖五年的女友，年初才分手。開始時又是一場越級挑戰，女友家境有米，手持多個工廈豪宅。他只是月薪萬多元的大台綠葉，為生計，有段日子身兼地產經紀及開過酒吧。冇樓冇婚期，貧富懸殊的戀情最終無法修成正果。
廿五年首獲尊重
當男一，終圓心願，哪管是蚊型製作，至少感受到前所未有的尊重。「我一落機，就聽到接機嘅人稱呼我做戴老師，第一次聽到人家咁叫我，當時仲心諗：『我不是來做老師！』，後來才知係國內對有資歷嘅演員，一個尊重嘅稱呼。拍攝時又助手又保母咁安排晒俾你，係我演藝生涯第一次嘗到嘅配套，無論之後仲有冇機會，抑或得呢一鋪，你見到自己將電影海報，呢個回憶真係要鎖喺夾萬。以往年年生日，啲 friend都祝我快啲做男一，終於達成。」訪問當日，戴耀明著住校服應約，他說想帶出一個訊息：雖被稱呼做老師，但演員是終身學習。
俾林保怡批中
在大台做了廿五年綠葉，說意志沒被磨滅就騙人！直至林保怡一番話，戴耀明又有動力。「初入訓練班時，係諗住可以做男一，個個都雄心壯志，覺得自己唔係劉華，就係發哥㗎但自己又冇搵盆水照吓鏡，哈哈，之後冇再妄想。十幾年前，有日林保怡同我講：『小明，你呢啲唔係男一樣，但你個樣，遇上套劇需要呢啲特質時，你就有機會做主角。』我就似廖偉雄嗰類咁，當刻聽完係俾到啲希望，不過第二日瞓醒就冇再諗。依家見到黃光亮返入電視台變咗男一，又俾番啲希望我。」
撰文、攝影、攝錄：娛樂組
場地提供： The Stadium Bar& Restaurant
|
鍾意就快D Share啦！
|
|
|
