袁海文話，因為黃碧雲當年喺理工大學教書，大家傾多咗偈，令佢開始想去了解民主黨。
八卦陣
黃碧雲 帶袁海文入黨
立法會補選九西初選由姚松炎高票勝出，民主黨袁海文雖然行人止步，但佢嘅從政之路仍然好漫長。佢同《壹》仔講起，當年讀大學時去法國做交換生，撞正工人大罷工，佢見一班工人身體力行為自己爭取權益，令佢開始想更加積極去從政。
卿姐仁哥啟蒙
於是佢返香港之後，就去咗民主黨做實習。至於點解會揀民主黨，佢話都係一個機緣巧合，因為當時民主黨現任立法會議員黃碧雲，喺佢讀緊嘅理工大學教書，同黃碧雲傾多咗偈，令佢想去 explore吓民主黨係一個點樣嘅政黨。
袁海文話，當時做實習遇見好多白鴿黨內前輩，都令佢好佩服。例如當時佢曾經透過電郵，向卿姐（劉慧卿）請教一啲問題，卿姐竟然親自打番電話覆佢，令佢覺得對方連實習生都好尊重同重視。
佢又話，見到仁哥（何俊仁）由保釣到反日本侵略、支持慰安婦平反等嘅行為，「始終好如一，都係追求一種價值、一種公義，同埋都係好為國家貢獻……所以其中一個關鍵原因加入民主黨，都係喺實習期間遇到嘅人，都係好好嘅人，同埋好認真為香港。」
坐開篷巴士拉票「巴膠」張秀賢感恩
舊年三月，曾俊華坐開篷巴士終極巡遊，為特首選舉做最後衝刺，超過五千名市民逼爆愛丁堡廣場，振臂為佢打氣呢一幕，相信唔少人仲記憶猶新。上星期被人突襲打傷嘅學聯前常委張秀賢，喺民主派初選都出動開篷巴士巡遊拉票。
出戰新東嘅張秀賢，當日朝早開始坐開篷巴士，遊走將軍澳、沙田、馬鞍山、大埔等地造勢，亦有落車拉票。佢巡遊未及曾俊華咁有氣勢，但強調用巴士宣傳，有助鼓勵市民了解咩係初選同埋出嚟投票。
其實張秀賢細細個就已經係巴士迷，最開心就係考試攞高分，屋企人送玩具巴士俾佢做禮物。上星期四東鐵綫全線癱瘓，咁啱喺大圍擺街站嘅佢，即刻發動「巴膠」技能，為街坊提供巴士路線。今次初選能夠坐佢最鍾意嘅巴士拉票，一定好難忘。
巴膠決戰新民主同盟范國威同工黨郭永健，三人之中佢年紀最輕，最終以最低分敗選而回。佢拉票嗰陣同《壹》仔講，今次係一個好寶貴嘅經驗，不論輸贏都好，都學到好多嘢，「起碼你真係試過選舉，你先叫真係搞過政治吖嘛。」所以佢話好感恩，有今次機會可以參選。
撰文：巫不言
news@nextdigital.com.hk
|
鍾意就快D Share啦！
|
|
|
