掃呢頁CODE去手機

2018年1月18日 星期四

生完 B拒復工推千萬大陸劇真人騷胡杏兒:我要即刻追多個 [壹週刊 - 1454] __,杏兒,中國,大陸,胡杏兒,M1,

生B後唔願復工,早排杏兒同老公湊B遊西貢,享受師奶仔生活。娛頭生完B拒復工推千萬大陸劇真人騷胡杏兒:我要即刻追多個胡杏兒15年嫁俾Philip做人妻, ...






生 B後唔願復工,早排杏兒同老公湊 B遊西貢,享受師奶仔生活。

娛頭

生完 B拒復工推千萬大陸劇真人騷胡杏兒:我要即刻追多個

胡杏兒 15年嫁俾 Philip做人妻,出嫁當日杏兒在「李家祠堂」戲言要一年抱三。結婚年半,兩公婆成功製造第一 B,仲一索得男,杏兒總算對李家列祖列宗有交代。

一向事業型的杏兒,原本計劃產後坐完月就即刻復出,點知自從 Brendan(李奕霆)出世後,杏兒俾得意仔融化,勁享受做阿媽湊仔,而且唔捨得放手俾工人湊,所以改變主意唔願復工不特止,仲想即刻再追, 38歲的杏兒仲有時間,加把勁喇!







Philip全程負責用孭帶孭住 B仔。





同奶奶感情要好,杏兒沿路一直繑住奶奶行。

同老豆餅印

上年母親節當日,杏兒宣布造人成功, Brendan十月出世,而家足三個月大,早前 Philip將 B仔正面相開心 share,公布埋囝囝中文名叫李奕霆,英文名叫 Brendan,已經有十八磅重的 Brendan肥嘟嘟,好好肉地,皮膚白雪雪,仲有對圓碌碌大眼睛勁精靈,人仔細細頭髮勁濃密,樣子似足爸爸,十分得意!





杏兒拎住換完嘅尿片四圍搵垃圾桶。





Philip抱住個仔又攬又錫,好肉緊。





Brendan喺 BB車瞓得勁冧。 3個月 18磅





B仔扭計, Philip拿拿臨叫老婆沖奶。





杏兒同奶奶在健康食品店掃貨。

極速收身

日前新手爸爸媽媽湊住 B仔遊西貢,身邊仲有杏兒奶奶傍實幫手,呢日杏兒一身運動衫,戴住白色 Balenciaga cap帽,生 B三個月,杏兒都算收身成功,著住貼身 legging,大髀都冇多餘肥肉,相信減多十磅八磅就回復以前未生一樣咁弗。

到埗後奶奶負責推住 BB車, Brendan正在熟睡,一行人爭取時間四圍搵嘢食,最終揀咗間西餐廳,揀正門口位坐低,之後杏兒睇 B, Philip就去點餐,嗌之前仲專登問老婆想食乜,夠晒體貼。可能因為餵人奶關係,需要足夠補充,所以杏兒似乎好好胃囗,見到老公放低漢堡包,即刻開心到「嘩」一聲。嘢食到齊, Philip相機食先,之後杏兒又薯條,又漢堡包,大大啖擺入口,不過食還食,杏兒嘅視線全程都無離開過 B仔。





趁 B仔瞓覺,三個大人坐低食個 tea,抖一抖。





兩公婆夾手夾腳整好孭帶,杏兒 check完又 check,確保穩陣。





杏兒大啖大啖漢堡包擺入口,完全唔怕肥。

餵奶換片





食完 tea,轉頭兩公婆又幫襯生果店飲果汁。

三個大人食飽後, Brendan啱啱瞓醒, Philip準備孭帶,不過呢個新手爸爸似乎仲未熟手,舞咗一輪都搞唔掂,最終要杏兒出手,兩公婆夾手夾腳先將孭帶整好,跟住三個大人小心翼翼將 B仔抱起放入孭帶。然後一行人漫步去附近一間專賣健康食品店,杏兒同奶奶掛住入貨, Philip喺門外湊 B過二人世界,其間 Philip仲不停攬實阿仔啜完又啜,好肉緊!

唔夠十分鐘, Philip突然緊張走入鋪頭搵老婆,原來 Brendan肚餓扭計,杏兒要準備奶,之後 Philip拎住奶樽,抱阿仔返上車,杏兒同奶奶在車內餵奶, Philip同司機就喺車外等,約廿分鐘後,杏兒拎住換完嘅尿片落車,行去搵垃圾桶。

餵完奶換完片,阿仔開心晒,一行人再折返鋪頭繼續入貨,逗留十分鐘後再行去附近生果鋪,揀完生果,杏兒隨手拎出一大疊一千蚊俾錢,買完嘢準備返歸,臨走前杏兒叫奶奶和老公同 B仔合照,自己負責揸機,之後行去上車,杏兒沿路一直繑住奶奶手臂。

即刻再追

出名事業心重的杏兒,臨生 B前都仲開緊工,呢頭同「胡說八道」拍完旅遊特輯,轉頭又忙婚紗店生意,做到最後一刻先肯停,講明唔會做全職媽咪,原本計劃坐月後第一時間復工,但自從 Brendan出世後,就將杏兒徹底融化,復出大計要暫時擱置。

「原本杏兒真係諗住坐月後就復工,加上佢有奶奶幫手湊,完全唔使擔心。但而家佢日日對住個仔,心態一百八十度轉變,竟然唔願開工,因為個仔實在太得意,見住佢就開心,加上佢好享受做人阿媽,仲好有衝動要即刻追多個,况且老公又搵到錢。所以就算幾部劇集等住佢開工,都打動唔到佢,俾佢以前諗都唔使諗一定接,而家全部推晒,陪個仔緊要啲!」





Philip一放假就全日霸住孭 B,全程視線離不開個仔。





一家大細行到邊影到邊。

B仔好腳頭

去年杏兒返內地拍攝劇集《那年花開月正圓》,仲唔理老公詐型,大肚七個月堅持返內地跑宣傳,終於劇集在內地爆出,累積超過七十億點擊,令杏兒人氣急升,仲不斷有廣告商同電視台重金禮聘杏兒同 Brendan母子檔亮相。

「杏兒未坐完月,已經有好多廣告商同電視台搵上門,邀請佢哋母子檔上鏡,酬勞都好吸引㗎,不過杏兒講到明暫時乜都唔會諗住,始終 BB仲咁細,同埋點都要得到老公批准先得,所以經理人公司惟有忍痛全部都推晒,有錢都唔賺,或者等 BB大啲先再算。」杏兒身邊人透露。





事業型的杏兒,俾寶貝仔融化,產後不停推 job。





結婚當日,杏兒在李家祠堂,對住鄉親父老戲言要「一年抱三」。

戒蒲變黐家男

男主外,女主內。杏兒有 B萬事足,事業心熄滅,搵奶粉錢重任交晒俾 Philip。上週(日),下午三點 Philip單拖外出,先去沙田警局,離開時一臉愁容。之後直駛返去尖沙咀公司,開會直踩到晚上九點先收工, Philip拎埋外賣離開,急趕再返回大埔寓所見 BB。

「其實杏兒復出定唔復出, Philip都冇乜意見,無論點佢都支持。反而係以前佢收工都鍾意約吓朋友飲嘢食飯,而家真係甚少,一放工即刻想返屋企睇仔,佢放假仲會同老婆爭抱 B。」





Brendan三個月大,眼仔碌碌,頭髮又濃密,超得意!





大肚七個月,杏兒唔理老公詐型,堅持到內地跑宣傳。





老婆屋企湊 B, Philip努力搵奶粉錢,放工又即刻返歸做住家男。

唔只追一個

壹:湊仔湊成點,之前見你都好熟手,餵奶換片都自己搞掂晒?

胡:之前一開始真係有啲揦手唔成勢,因為始終係新手媽咪嘛,好在 有我奶奶幫手囉。

壹:幾時會復出開工拍劇,不過收到消息你呢幾個月推咗幾套大陸劇 同埋真人騷?

胡:因為我而家係餵緊人奶吖嘛,好難丟低阿 B好遠嘅。

壹:會唔會同囝囝一齊拍廣告或者真人騷?

胡: BB好細喎,真人騷?佢乜都唔識做,佢而家一嚿飯咋喎!

壹:係咪想再即刻追多個?係咪想生女?目標要生幾多個?

胡:一定想追多個,唔只一個,因為 BB真係好得意好好玩,好可愛, 所以如果自己能力範圍做到嘅都想追多個,係我要追多個。

生完唔願做

圈中不少藝人婚前積極唱歌又拍劇,反而生完之後,專心做湊仔婆,似乎未有復出計劃。





鍾嘉欣

16年與脊醫老公 Jermey結婚,並火速誕下愛女 Kelly,鍾嘉欣大部分時間長居溫哥華專心湊女,間中先返港賺奶粉錢,而老公亦禁止再續約兼拍劇,決心開行 turbo再追仔。





葉翠翠

去年四月,葉翠翠與老公 Raymond誕下囝囝小王子,翠翠未有復出打算,生完未夠半年,已經積極追第二胎;上月,葉翠翠公布成功再度懷孕,為安胎唔接 job,仲足足臥床兩個月,三年抱兩真係唔簡單。





謝安琪

近年張繼聰發圍擔起頭家,自去年三月誕下細女張靖後,謝安琪停工大半年,有傳 Kay有意簽麥浚龍公司,但老公張繼聰一直唔想 Kay復出,要老婆做小女人,繼續喺屋企照顧一對仔女起居生活。





楊愛瑾

去年三月底, Miki為郭家誕下囝囝 Luken後,一直過住幸福少奶奶生活,不時被拍到行街 shopping,又經常於 Ig大晒一家三口家庭照,有仔萬事足。

撰文:娛樂組 

攝影:蕭敬漁、李溢敏 


鍾意就快D Share啦!