掃呢頁CODE去手機

2018年3月8日 星期四

藍血高球會長頭痕 [壹週刊 - 1461 - 財經] __,M1,

粉嶺哥爾夫球會於一九一一年在粉嶺劃出十八洞球場,於一九二○年再獲批額外土地建新場,於一九三一年正式啟用。中環人語藍血高球會長頭痕粉嶺哥爾夫球會部分靚地 ...






粉嶺哥爾夫球會於一九一一年在粉嶺劃出十八洞球場,於一九二○年再獲批額外土地建新場,於一九三一年正式啟用。

中環人語

藍血高球會長頭痕

粉嶺哥爾夫球會部分靚地,隨時被政府收回,球會會長黃子超( Arnold Wong)都十分頭痕,雖然佢個人同張 CV都好「靚仔」,是正牌藍血人 Blue Blood,老豆係前律師會會長黃頌顯,是東亞銀行創辦人之一, Arnold於英國牛津大學畢業,修讀法學 Jurisprudence,喺倫敦 KPMG滙豐投資銀行部都做過,同一班少爺兵創辦食肆 Classified;不過呢場球會保衞戰唔易打。

嗱,清明又快到,小宗醒 Arnold一條好橋,貼地啲同班新界鄉紳打吓交道!何解?早喺粉嶺哥爾夫球會成立之前,上水廖氏族人祖墳早已設於球場內,英國佬政治手腕了得,祖墳塊地雖然劃入球會之內,但每年清明節皆開放讓廖氏族人浩浩蕩蕩入球會祭祖;而每年四月份廖氏原居民皆可到上水鄉事委員會報名,申請入會打高球;雖然只限打波未能享用餐飲設施,也足以令鄉紳揸住支球棍去威威;粉嶺哥爾夫球會如要動土起樓,影響到廖氏祖墳,班鄉紳仲肯過你咩?附近許世勳家族「愛園」塊地想起樓,因為「踩到」附近松柏塱村簡氏族人之龍脈,遭到鄉紳群起反對,連城規會都 say no。





上水廖氏祖墳設於粉嶺哥爾夫球會內,靠近最古老的一座大樓,清明節廖氏族人容許入內祭祖。





黃子超現時為香港哥爾夫球會之會長,也是 Classified創辦人之一,父親是前律師會會長黃頌顯。

恒生 Sa姐布局有一手





恒生一姐鄭慧敏篤信風水,曾經改名鄭蔚彤,早前穿上紅色戰衣接受報章專訪。

人稱「 Sa姐」嘅恒生一姐鄭慧敏( Louisa)上場八個月都交到功課,佢嘅強項零售銀行業績標青,喺銀行內口碑都唔錯,作為大旗手的 Sa姐,方向清晰,有啲銀行界女強人都好想過檔跟隨 Sa姐,此乃個人魅力也,全行都知, Sa姐篤信風水,佢有位女性御用風水大師幫佢睇寫字樓風水,以往喺滙豐時, trader第二朝返工會見到枱底有銅錢, Sa姐仲會幫啲下屬睇埋㗎,不過唔好搞錯,此舉並非眷顧下屬咁表面,只係睇吓同佢自己夾唔夾咋!

屎忽撞棍 Hole-in-One

我成日都講,俾你估到的話,我仲叫 Alex Yeung咩?我匹新馬「龍串鳳」同我一樣估你唔到,週六賽馬日第一場,賽前我都同老友講,係處男馬,無 track record,細細注好啦,哈,開跑時都包尾,差啲影都無,點知臨尾追上,英國紳士打波 hole-in-one君子棍,佢就屎忽撞棍,十足「巴基之星」咁,賽馬日第一場我拉頭馬,班馬經版記者湧埋嚟採訪,竟然問我係咪新進馬主,超!真係谷鬼氣,我廿幾歲時已同人夾份養馬啦,如果唔係使鬼改名「龍串鳳」,就係唔想日日褲穿窿嘛,本來想話夾份嘅女馬主仲話:「龍串鳳,你哋四個男人咪即係想插我!」我心諗,你就想呀!唔係龍穿鳳呀!講埋呢啲嘢!夾夾埋埋養馬費都無咗幾百萬,今鋪贏咗啲獎金叫做幫補吓養馬費咋!之前夾份養過一匹,改名叫「耀眼生輝」,改個名嚟「擦」住個練馬師姚本輝,點知未曾出過賽已經要退役,你話邪唔邪!猶記得馬會大董見我無入紙去抽馬,就親自打電話嚟問:「阿楊唔見你去抽馬嘅?」但我去抽時又唔見佢關心吓我,呢啲叫老友喎!仲話:「嘻,你輸唔起咩?」

其實贏馬都有好多規矩,不過你哋未贏過就唔知,請飲香檳就梗㗎啦,等於打 golf Hole-in-One,要請晒全場飲香檳!個老友嗰日同我爭俾錢,我話:「驚你買得少,贏咗都唔夠找呢支香檳數呀!」

楊國佳——已故工廈大王楊耀松長子,自詡為工廈小王子( Princeling),眼見香港各方面之國際水平愈見低落,身為退休人士,要豁出來點醒香港人嘅思維。





贏馬要請飲香檳,有個老友同我爭俾錢,我話:「驚你買得少,贏咗都唔夠找呢支香檳數!」





「龍串鳳」是一匹 BB馬,馬評家話父系好掂喎,咪即係似我囉!





有個老友未開跑前講:「驚你無力拉馬,我哋嚟幫手!」承你貴言!





成班馬經版記者湧埋嚟!

朱太飲恨農行 再戰中環

習權時代,由神秘太子黨操控之財閥,海航、安邦、萬達兵敗如山倒,紛紛賣資產減債,去年長實以四百億元把中環中心七成半股權出售予中國國儲能源為首之福建幫,最終因啲錢出唔到國,被迫搵人接貨,最終落入金利豐老闆朱太手上,金利豐寫字樓位於國金一期二十八樓,一直想在中環物色一幢寫字樓,咁先至夠架勢,二○一二年由樂聲持有的干諾道中五十號全幢甲級寫字樓放盤,朱太偕同父親樹福和老公齊齊去睇樓,可惜唔夠農業銀行快手以五十億元成交,呎價兩萬七。聽講當時朱太非常飲恨,六年之後,朱太終於如願以償成為中環中心大業主!殼后通常喺緊急關頭先出手,估計呎價都唔貴得農行成交價好多!





數年前,朱太偕同父親——人稱樹福(右一),有意購入現時農行大廈。





農業銀行大廈前業主樂聲,二○一二年以五十億元售予農行。

撰文:宗菁華 


鍾意就快D Share啦!