掃呢頁CODE去手機

2018年3月8日 星期四

最美的時光 [壹週刊 - 1461 - 生活] __,M1,

森美豪語錄最美的時光人愈大,愈喜歡想當年。回憶中的那些年,總是笑中有淚。如果時光可以倒流,最想倒帶在哪時?森美毫不猶豫說:「初中嘅時候,因為係我人生當 ...






森美

豪語錄

最美的時光

人愈大,愈喜歡想當年。

回憶中的那些年,總是笑中有淚。

如果時光可以倒流,最想倒帶在哪時?

森美毫不猶豫說:「初中嘅時候,因為係我人生當中最快樂嘅時間。」

人愈大,愈難快樂,現實社會發生的事,的確很易磨滅應有的快樂,不過,要快樂其實不難,偶爾約班老朋友聚一聚,不論經濟不論政治不論生活,純粹的想想當年,你便會發覺,那一刻很快樂!

最開心的兩年

四十四歲的森美,原名梁志健,於九四年參加商業電台「叱咤殺戮新大陸」入行,又有拍電影、電視劇、司儀等工作,是位多方面發展的藝人。數一數,森美入行已廿三年,如果時光可以倒流的話,最想回到哪個時候?他說:「最想返番初中嘅時候,因為係我人生當中最快樂嘅時間。」記得初中時候,要面對很多不同的轉變,那段青葱歲月,的確值得留戀、回味。「由小學轉到中學,開始拍拖,又因為轉咗去赤柱一間寄宿學校,所以開始寄宿,可以離開屋企。嗰時已經開始長大,覺得爸爸媽媽管住好煩,日日都喺學校同同學一齊玩一齊瞓,好似去 camp咁,所以嗰時係最快樂最開心嘅兩年。」

寄宿用了屋企很多錢

幾乎每位青年人,都曾經嫌過父母嘮叨,森美亦不例外,當時這個年輕人,很快成家立室,他與太太陳雅嫻結婚十多年,大仔梁曦樂( Lancelot)已十四歲,細女梁曦童( Charisse)亦已十一歲,身為人父後,方知做父母不簡單。「我諗每一個人學習湊仔都係爸爸媽媽點教自己,就用番差唔多嘅方法去教佢,再加入埋自己少少嘅經歷。但有一樣好緊要,就係俾到愛佢哋,等佢哋知道係錫佢哋嘅,已經好夠。我細個生性嘅原因,係因為爸爸媽媽俾我去寄宿,我知道寄宿用咗屋企好多錢,然後就開始生性讀書,就算讀書唔係好叻,我都開始俾心機,慢慢搵到讀書嘅正確方法,集中到精神去讀書,而家都係用呢個方法,用付出去話俾佢哋聽,等佢哋學懂珍惜。」





一向很少提老婆的森美,早前在主持的旅遊節目中講起老婆時忍唔住喊,令人印象深刻。

前世好友與前世情人





森美說人生最開心的日子,是初中的時候。

當年森美讀寄宿學校後變得生性,亦因為這個原因而將兒子送到英國讀書,「我俾佢去英國讀書都係呢個原因,佢都差唔多青春期,已經無乜嘢同我講,同我細個去寄宿差唔多時間,所以都覺得好啱佢成長嘅過程,會話俾佢聽我嘅痛苦,因為去外國讀書真係貴,我唔係好富有,希望佢明白,用番呢個方法等佢生性。」送兒子到英國讀書,森美因為唔捨得,為此流下不少眼淚,幸好身旁有個硬淨的太太,及被時間平伏了心靈。

很多爸爸都會偏心女兒,說她是前世情人,森美亦不例外,「梗係啦,啲人成日話女係前世情人,我曾經寫過一篇文章,話仔係前世好友,每個阿爸都希望同個仔好似朋友一樣 friend,一齊傾到偈,我小時候都渴望同爸爸一齊飲杯啤酒、一齊睇波、一齊傾吓偈,嗰種就係前世好友。女係前世情人,係由細個直到佢青春期,而仔係前世好友,係青春期之後,兩個係擔當唔同角色。我係好典型嘅虎爸,當然都希望教佢哋多啲,但同一時間都希望同佢哋分享佢鍾意嘅嘢,然後享受嗰種樂趣,所以仔同女,係前世情人同前世好友,嗰兩種對待係有少少唔同,不過我好幸運就係,個女差唔多大唔做我情人時,就有個仔做我好友,平衡番開心啲嘅。」

女兒不再黐我

很多女孩小時候愛黏住爸爸,長大後會親媽媽多一點,那 Charisse是否一樣?森美扁嘴說:「女仔去到青春期,天性就係唔鍾意爸爸,覺得爸爸老土。」森美算是潮人,在女兒眼中竟變成老土一族?「佢都覺得你老土,我好大隻嘅時候,喺屋企有時除咗件衫,佢會話你唔好成日除衫,著番件衫有時學校遊船河,佢淨係叫媽咪去,我話點解你唔叫我去,佢話費事我又除衫,唔俾我去,我話除衫無問題吖,我咁 fit,佢話就係唔鍾意你除衫!呢啲就係女仔得意嘅地方,佢青春期開始怕醜,見到爸爸除咗上身衫覺得唔鍾意。早幾年佢細個嘅時候,一放學返屋企就會衝埋嚟攬住叫我,而家返嚟叫完我就走咗去,我叫佢攬吓,佢個身唔會掂到你嘅,淨係兩隻手黐住,個身就挨後嘅。」 Charisse已經十一歲,懂得兩性的分別,對於她突然變得疏離,森美難免感失落。「當然好失落,我寫咗篇文章係講前世情人同我分手嘅最後一日,分手日係幾時我仲好想記得番,究竟邊一日係佢同我嘅最後擁抱,邊一日係佢仲肯黐住我,全身好似樹熊咁攬住我,我好掛住嗰一日,但嗰日係幾時我已經唔記得咗,眨吓眼佢已經唔再攬我,嗰種痛,而家講番我個心都好酸,我諗好多爸爸到個女開始大嘅都感覺到。」

退休要有第二個人生





森美與太太陳雅嫻結婚十多年,

大仔梁曦樂( Lancelot)與細女梁曦童現已是青少年。

森美是早婚一族,仔女開始成長,四十四歲的他可以功成身退,享受生活,他說:「其實早幾年已經想退休,只不過係心態問題,覺得人生最重要係家庭,呢幾年都開始放慢腳步,唔好逼到自己咁緊,但係因為小朋友上年開始要去外國讀書,所以大家見我多咗,成功靠父幹,我能夠幫嘅就幫吓佢啦,等佢可以好啲去預備自己人生,當然往後人生就幫唔到佢,我無得餵佢食飯,希望佢自立,俾佢去外國讀書都係因為咁,我諗退休嘅時候係,要再諗一諗目標係為乜嘢,然後有 second life,我以前係一個電台工作者,做傳媒嘅,我而家可以放低晒所有嘢,然後去教人滑雪,做一個滑雪教練,我覺得係可以俾自己一個 second life,會令你重新選擇,有機會再問一次自己想做乜嘢,然後跳去另一個人生,呢個係我哋呢一代嘅人應該擁有嘅退休態度,而唔係我哋上一代,匿埋捉棋過日辰。」

減少工作陪太太

一人身兼多職的森美,工作排得很密,很易忽略身邊人。「其實早一、兩年少啲做嘢係好啲嘅,因為我本身係一個急躁嘅人,當好多嘢做嘅時候,個人好容易有脾氣發,返到屋企會唔出聲。前兩年我好少做嘢,做完電台節目,晏晝同佢食飯,搵地方飲茶,然後陪佢去騎馬,陪佢做佢鍾意嘅嘢,夜晚等小朋友返屋企,同佢哋一齊游水、食飯,睇佢哋做功課,嗰個人生我發覺幾幸福、快樂,但工作一忙就無嗰個閒暇去享受,但我諗而家對於我最重要,都係希望減少啲工作,除咗對自己家庭,仲有爸爸媽媽,幸好佢哋都好健康。」對於一對仔女,森美可有任何期望?「有㗎,個仔去英國讀書時,我講笑話唔係牛津同劍橋畢業你唔好返嚟,當然咁樣同佢講係因為佢從來無壓力,讀書比較 carefree,所以成日咁樣講去 push佢,囡囡就相反,對自己好有要求,我記得睇佢成績表,好多時都係優異生,成績都係頭五名、十名之內,所以每次派成績表,我睇上面成績,佢就會先睇下面,睇吓自己係咪優異生,我就知道佢好緊張,會對佢講唔好咁緊張,所以兩個係因材施教,有唔同性格用唔同方法,囡囡就要叫佢放鬆啲,有次太太打嚟叫我估吓個女數學幾多分,我就最驚,我話你唔好話俾我聽一百分,佢話係呀一百分,所以每一次都會同佢講唔使咁高分喎,有努力讀就得,唔使咁高分,八十幾就 OK啦,唔使一定要九十幾,希望等佢放鬆啲,唔好咁緊張。」

我的最美時光

筆者於二○一一年加入,雖然只是短短七年的時間,但這些年卻是我打工人生中最美的時光。我遇過的人或事,令我成為更好的一個我,多謝。

撰文:海 山 

攝影:黃志明 

設計:喬伊力

髮型: Vince@ IL Colpo 

場地提供:美樂照相館


鍾意就快D Share啦!