歌手羅力威今日同拍拖七年的女友雨僑拉埋天窗，一對新人今日上午在淺水灣進行注冊和行禮儀式，其後在下午舉行雞尾酒會招呼各圈中好友，到晚上宴會時二人就曾透露只招呼雙方的親人朋友，一對新人剛剛現身接受傳媒訪問，
咩都估估吓
問到是否一早諗定講詞？羅力威就說：「我唔識講嘢㗎其實！我係咁㗎咋！」聞記者笑他隨口講都咁樣，羅力威就向雨僑道：「係呀，中計喇你！」雨僑甜笑回應：「邊個中計都未知！」羅力威續說：「其實頭先我冇講呢啲嘢嘅，只係好大概地多謝啲親朋好友嘅來臨，同埋多謝記者朋友喇，你哋成棚人咁樣，包咗架旅遊巴來支持。」羅力威又關心現場記者有無飲水和不要中暑。雨僑就大讚老公：「同埋今日你哋見到好犀利，出面嗰啲布置，所有場地上嘅安排，傳媒同親友啲車全部都係佢一手一腳安排，我除咗book場之外冇做過任何嘢。」羅力威接說：「所以我會覺得，本身覺得冇可能做到嘅嘢其實係做到嘅，會覺得帶到畀我哋好多信心，以後無論遇到啲咩都可以去面對，一開始我哋只係膽粗粗咁樣去book是但一日去行禮，唔理嗰日係咪會行雷閃電，落雨又好打風又好，都係估㗎咋，諗住只要唔係最凍或者最熱，揀啲唔係春天好潮濕或者夏天曬到正，就咁求其揀一日囉，跟住之後先至慢慢逐步，好似完成一個估唔到會原本咁大件事嘅嘅一樣嘢。」
工作排到七月
講到度蜜月，羅力威指未安排：「未呀，因為佢之後都可能會飛。」雨僑亦說：「暫時我啲工作排到去七月，係好滿，我2號已經要開工，蜜月就可能要排到去秋天嘅時候。（今日個婚禮用咗幾多錢？）剩係場地我諗都用咗30萬，唔計所有其他嘢。」問今朝無接新娘環節？雨僑說：「冇呀，我哋各自各，今朝我望咗佢一眼咋，就來咗行禮喇！」羅力威話：「總之我哋尋晚講電話就臨收線之前都係：『唔同你講住喇，我好攰呀。』就到今日來到呢度先見。」問到夜晚的安排，雨僑說：「夜晚就剩係同屋企人食飯，大概有200人，會去另一個場地，就冇圈中朋友嘅。」
問到何時生小朋友？雨僑笑言：「婚禮之後要回一回氣先！」羅力威就說：「有啲傷傷哋，個荷包傷傷哋，要努力做吓嘢，同埋呢方面都要認真諗一諗，呢樣嘢雖然話係一種喜好，即係問你係咪想生，你話想嘅咪就係一種喜好，其實除咗係喜好都要諗得好清楚嘅。」至於目標生幾多個？雨僑答：「目標呀，一、兩個喇！」羅力威說：「呢啲嘢交畀佢喇！」雨僑又解釋：「我哋覺得生唔生都事小，最緊要係點樣教同養，如果有咗小朋友就要花多啲時間照顧屋企，所以現階段都未得住，加上手上仲有好多工作要完成，等到真係完成晒先再諗。」
----------------------------
東網巨星開咗ig喇，大家快啲follow
https://goo.gl/KGuo2N
|
鍾意就快D Share啦！
|
|
|