于仁泰爆李小龍之子死亡真相
本月31日是一代巨星李小龍的兒子李國豪逝世25周年，當年他拍攝電影《烏鴉》（Crow）的槍擊鏡頭發生罕見意外身亡，惟死亡原因多年來一直成謎。曾和李國豪合作電影的導演于仁泰接受本報獨家訪問，詳述意外經過，除指對方家居風水有問題外，更爆出李國豪年少輕狂的軼事，高志森更一度怒極想以大燈打他洩憤！
近年移居澳洲的導演于仁泰，昨日接受本報獨家越洋訪問，大談逝世25年的李國豪。兩人緣分始於1986年，當時李國豪主演由于仁泰執導的電影《龍在江湖》，電影拍畢後兩人繼續保持聯絡，李國豪就連和女友分手也向他傾訴。當年李國豪接拍「死亡之作」《烏鴉》前，于仁泰曾鼓勵對方參演：「當時國豪畀劇本我睇，我同佢講呢套戲會令佢上一線演員位置，臨開工前都有同佢見面，估唔到係最後一次見！國豪當時已好有錢，喺美國荷里活大道買咗已故影星愛路扶連（Errol Flynn）嘅故居。我睇過間屋，有同佢講風水似乎有問題，提議佢搵風水師睇睇，但被佢鬧我迷信。」
負責軍火人員「冇洗槍」
1993年3月31日，李國豪為《烏》片拍槍擊戲時發生罕見意外而身亡，英年早逝，結束廿八年的人生，自此坊間對其死因流傳不少版本，當中有傳涉及尋仇。于仁泰為對方平反：「我都覺得整件事好古怪，問過荷里活圈中人士，佢哋解釋話套戲係獨立製作，成本有限，處理槍械啲軍火嘅人唔係工會人士，而佢哋同美國八大電影公司嘅處理道具槍嘅手法唔同。八大電影公司會好緊張處理，用完一支槍之後就要換槍，並將槍枝清洗過，但負責《烏》片軍火嘅人冇洗槍，搞到含有木碎嘅雜質塞喺槍管入面，所以開槍時木碎打入咗國豪嘅肚臍內。佢拍完個中槍鏡頭後好肚痛，當時工作人員以為佢普通肚痛，就畀藥佢食，點知最後內出血過多，所以整件事絕對唔係尋仇！」
因父之名 拒拍動作片
雖然于仁泰澄清死因跟尋仇無關，但談起李國豪的處事作風，不難發現有一份年少傲氣，並曾發生不少不愉快事件。于仁泰說：「拍《龍》片時國豪唔係好合作，唔肯打，我惟有將套戲轉為充滿火爆場面嘅槍戰片。有日編劇高志森打畀我，喊打喊殺嬲到話要用支大燈嚟打國豪，武術指導孟海同其他武師亦覺得佢好招積，想郁手打佢，而我每日都擔驚受怕，驚佢畀人打而拍唔到戲。武師話明會喺煞科宴笠麻包袋圍打國豪，我知道後叫國豪唔好去。佢大個咗後都變晒，變得好易相處。」
因父之名，李國豪承受不少壓力，于仁泰說：「佢話明唔准提李小龍同唔會拍動作片，佢話要做羅拔迪尼路（Robert De Niro），佢自己好喜歡做演員，但就唔想做功夫明星。後來我趁機會問國豪點解性格咁負面，佢話因為李小龍以前喺美國被人白眼睇唔起，而作為李小龍個仔，更令佢承受好大包袱，所以我將《龍》片嘅英文名改為《Legacy of Rage》（憤怒的遺產）。」
文：外娛組
|
鍾意就快D Share啦！
|
|
|