「洪爺」林子善今晚同董佩欣（Kary）喺將軍澳皇冠假日酒店補擺喜酒，筵開63席。一對新人換過禮服，拖手見傳媒。林子善係咁爆Seed講感動嘢，就連佢自己本人都俾自己感動到熱淚盈眶，例如話：「我雖然買唔到最大嘅俾太太，但Quality我可以俾到佢最好，因為人一世物一世，太太係值得我買俾佢。」
今早林子善帶埋成班兄弟包括袁偉豪、馬國明、鄭嘉穎同唐詩詠等闖關接新娘，林子善仲好得戚咁話so easy，因為班姊妹見到袁偉豪佢哋，已經失晒魂，自動開門咁滯。
愛的宣言呢？林子善就話：「做好自己好過講，我唔鍾意空口講白話。每一個進步同愛護，都係行動。同埋，首先我要照顧好我自己嘅身體先、做好我嘅工作，咁先可以保護到我老婆，因為我想同佢行埋下半世嘅路。」
接新娘雖然易過借火，但都有啲感動位嘅，「我未講愛的宣言之前，一跪低斟茶先啦，一跪低嗰下自己都已經忍唔住喇。」依家憶述番今早呢個情景，林子善都忍唔住兩眼一紅，熱淚盈眶：「啲姊妹搵到啲愛的宣言叫我講，我話唔使喇，掉咗佢因為呢啲唔係出自我真心嘅。但之後講咗三句左右，我又頂唔住喊。」
咁太太Kary呢？俾幾分呢個man得嚟又感性嘅老公？佢甜笑話：「100分。」林子善話：「你俾低分少少，例如話80分，咁要有進步空間0架嘛。」咁例牌都係要問有冇造人大計啦，林子善劈頭就話：「我唔得0架！」咁大件事？「唔係，我意思係未得住，我想我將來嘅小朋友有好好嘅生活，所以我希望自己努力工作、買樓先，同埋check咗自己身體先，或者下年啦。」
精選娛聞，喺晒《娛果》
http://fb.com/appledailyent
|
鍾意就快D Share啦！
|
|
|