香港人乜都爭一餐，大減價又爭，抽新股又爭，就連搭港鐵出閘都爭！港鐵調景嶺站禮拜日（1日）晚有兩個男人，懷疑因為爭出閘起爭執，出閘之後仲打起上嚟㖭。有趣嘅係，其中比較年輕嘅嗰位四眼仔，打交嗰陣好似經典格鬥遊戲《街霸》啲角色咁，對着個中年光頭佬䟴下䟴下，喜感十足。但從網上片段所見，呢位四眼仔好少出招，係咁向後褪，好多網民都笑佢「有姿勢冇實際」；有人仲問「係咪啲拳制、腳制壞咗，出唔到招？」認真毒舌。
網民Chan Tsz Kin禮拜日晚10點27分喺「香港突發事故報料區」facebook群組，上載兩段分別長15秒同1秒嘅短片，話7分鐘前港鐵調景嶺站有兩個男人因為「出閘爭位」而打交，仲形容兩條友係「ROUND 1 FIGHT……TKO（將軍澳）街霸」。不過兩條片只係影到「前傳」，冇ROUND 2、冇結局，其中一條片仲只係得1秒，結果片主俾網民寸爆，「睇完片發現有3個膠人囉，片中有兩個，另一個就係拍片嗰個」。
但相比片主，網民對四眼仔似乎更毒舌，唔止話佢䟴到亂晒陣腳，「阿叔爆氣除口罩，白衫（四眼仔）腳䟴䟴仲未chok到技」，「唔係跳下跳下就變李小龍㗎」，仲笑佢係咪同阿叔「跳緊cha cha？」「係咪啲拳制、腳制壞咗，出唔到招？」寸佢哋係「『高手』過招，點到即止」。
不過有玩開格鬥遊戲同對武術些少知識嘅花生友同我哋解釋，四眼仔嘅姿勢同套路，似有跆拳道底子，只係佢啲血（體力）唔夠光頭阿叔咁多，加上佢掃腳又掃唔高、勾唔準，所以當佢一個推手加掃腳都造唔低阿叔，就主力防守，同阿叔保持距離，「如果俾光頭叔叔埋身……應該玩完」。雖然四眼仔全程腳䟴䟴，的確幾搶fo，但花生友就比較欣賞阿叔一嘢除低口罩同背囊「爆甲」嗰下，大讚佢幾型，「可惜一出手有少少瘀皮」。
港鐵發言人同我哋講返，調景嶺站客務中心禮拜日晚10點幾收到報告，話有兩個男人出咗閘之後，喺D出口附近爭執，車站職員勸諭同嘗試分隔佢哋兩個，車務控制中心就報警求助，交畀警察跟進。警察公共關係科就話，當晚收到港鐵職員報案，證實29歲姓方嘅男人同49歲姓容嘅男人，因為身體踫撞嘅問題爭執，期間有拳腳來往，涉嫌喺公眾地方打交，結果俾警察拉晒返差館，由將軍澳警區刑事調查隊第4隊跟進。
提提大家嘞，香港法例第245章《公安條例》第25條列明，任何人在公眾地方非法打鬥，屬刑事罪行，一經簡易程序定罪，最高可被判罰款$5,000及監禁12個月。
記者 李鈺廷
網民點睇
Nicholas Wong：白衫四眼仔第一嘢低掃，其實入得好應，可惜之後個樁，䟴到亂晒。
Eric Kong：阿叔爆氣除口罩，白衫仔腳䟴䟴仲未chok到技。
Benson Ufo：係咪啲拳制、腳制壞咗，出唔到招？
Wilson Keung：跳緊cha cha？
丁山：「高手」過招，點到即止。
Jim Wong：好少見人打架覺得好得意，好想睇落去。
Koma Chan：唔係跳下跳下就變李小龍㗎。
Raj Ö Leung：拍戲都打得真過佢哋。
Kero Daisy：香港人精神壓力太大。
《蘋果》沙士15周年系列網站，正式登場：
https://hk.feature.appledaily.com/sars15
|
鍾意就快D Share啦！
|
|
|