港股重挫661點，主要受中國向美國報復拖累。人稱「沈大師」的訊匯證券行政總裁沈振盈對此表示，「Good呀！（點Good？）Good就係一路沽住去過夜！」
他認為，「貿易戰一定會繼續發酵，一定冇咁簡單…貿易戰你唔知幾時收科，特朗普張清單，仲要5月15號過聽證會，基本上冇可能會突然Withdraw。」他對後市繼續睇淡，恒指先睇2月低位29,129點，「到呢啲位附近，或者我都會，食咁啲淡倉；之後就換碼換價外Put。即係話，（恒指）喺嗰度，預會Chok一大輪先嘅。」他表明，「我繼續淡，唔會咁快買貨住。」除貿易戰外，港股尚要面對走資、港匯、息率等難以預計的陰霾。
「所以最聰明做法，就緊係喺之前一股不留，只拎現金啦。（啲人就係冇聽你講）依家冇計架，個個都唔聽我講。」
恒指走弱，到底是否熊蹤已現？「你問我呢句說話，如果你2月問我，我覺得有六成機會；3月我已經有八成機會，覺得係熊咗。依家係等最後技術數字，係可以Confirm（熊咗）。如坊間成日用嘅250天線，或者下破一個長期上升軌。通常呢啲係滯後，如果我睇熊市，睇市場情緒嘅，1、2月時我已幾肯定會轉熊市。」
提到騰訊走勢，「405蚊失守，跟住理論上應該觸發沽售壓力出嚟。」不過，現時追沽騰訊時機尷尬，「你一路問我都係話，要出業績前造淡倉，嗰吓就最靚。依家就尷尬啲，依家呢啲位跌穿咗，我估計360蚊至380蚊嗰度，會有啲反彈。因為騰訊反彈，可能個力會好大。可能星期五一開，就已經380蚊，嗰啲位追沽就尷尬，上下20蚊囉。」
全球樓行 Dream House零距離
https://hk.feature.appledaily.com/overseasproperty
|
鍾意就快D Share啦！
|
|
|