【新增內容】
陳瀅同劉佩玥(Moon)今日去到銅鑼灣 出席一個美容品牌活動，活動延遲近一個鐘先開始，原因係陳瀅爆裙遲大到，好朋友劉佩玥先出來應對大家，佢話：「唔好意思，我不嬲都好乖嘅，不過係好姊妹發生少少問題，條裙拉鍊甩咗補救唔到，要經理人再買條裙，真係唔好意思。因為活動係我哋一齊，如果自己一個出嚟先唔係太好，但知道大家等咗咁耐，所以出嚟同大家見面先。」
到陳瀅現身時多次自責同大家say sorry，佢急不昅待解釋：「今日經過好多難關先至嚟到，我喺尖沙咀揸車過嚟，過海後遇上一單交通小意外，於是我泊低架車行過嚟，期間條裙就爆咗，諗住換過條裙先見大家，令大家等我好耐唔好意思。第一次出現呢種意外，非常之內疚唔好意思。」
陳瀅指自己一向大頭蝦，知道條裙爛咗都即刻叫經理人去幫手買條新，但問題係身上條裙除唔到卡住咗，仲未諗到點處理，可能要剪爛佢。大家就提議佢下次出活動帶多條後備裙，陳瀅最初仲識得講笑話：「下次要帶定較剪同針線，諗過當大露背裝著，除曬入面啲嘢(指真空)，依家又尷尬又內疚又對唔住。」此時陳瀅夾一夾胸以示尷尬，之後立刻爆喊，Moon見狀即上前呵護好友。
另外劉佩玥早前同陳瀅去完俄羅斯旅行返港後入醫院，收到唔少朋友短訊慰問，佢話：「從來冇試過咁痛，好似扭毛巾一樣，我就係條毛巾，好驚要做手術，最後係腸胃入面淋巴發炎，要入院吊鹽水body check，咁大個女第一次因為健康問題咁著緊，依家keep住入院條手帶，提醒自己注意健康，亦奉勸大家珍惜健康。」Moon直認緋聞男友周志文有短訊慰問，而早前被拍攝到做跟得女友捧周志文打球賽，Moon話：「我鍾意睇比賽，大家敏感咗，好關注的我同佢，除咗佢亦都支持其他朋友，當然我都支持佢啦。」
另外，陳瀅同劉佩玥活動結束後音離開並分道揚鑣，陳瀅之後經過後巷到皇室堡上車，乘坐私家車返回電視城開工。
精選娛聞，喺晒《娛果》
http://fb.com/appledailyent
|
鍾意就快D Share啦！
|
|
|
