「第37屆香港電影金像獎頒獎典禮」今晚將於尖沙嘴文化中心舉行。噚日金像獎舉行拜神儀式，唔知係咪因為今屆頒獎禮由ViuTV作現場直播嘅關係， 無綫冇派人採訪。今日金像獎正式舉行，一眾嘉賓/侯選人行紅毯，無綫一樣冇派人採訪。（新聞連結： https://bit.ly/2ELUSYT ）
古天樂係今屆「最佳男主角」大熱人選，佢以金像同行大使身份，與立法局議員張超雄、香港罕見疾病聯盟會長曾建平一起，陪伴多位罕見疾病病友及其家人一同走上星光熠熠紅地毯，並參與當晚頒獎典禮的盛會，呼籲社會各界多些關注及關心病患者。
大會安排古天樂送禮物俾幾位病患者，其中一位患者瑤瑤更送上一幅自己親手繪畫嘅圖畫送俾古天樂。一班病患者落台後，古天樂留低接受紅毯司儀卓韻芝訪問，被問到提名「最佳男主角」心情點？古仔有啲cool咁話：「興奮」，卓韻芝再問係咪好緊張？古仔即笑笑口話：「緊張，你（卓韻芝）就嚟結婚，緊過我。」卓韻芝笑笑到見牙唔見眼，問到有冇諗過得獎講咩台詞？古仔話：「冇寫低，但有諗過，嗰刻想講咩就講咩。」
1746：憑《殺破狼‧貪狼》爭逐影帝嘅古天樂，一身黑色西裝配白色bow，問佢係咪有特別意思？「冇呀！覺得靚就著。」有冇帶「吉祥物」附身？古仔笑謂：「冇呀！」
1835：徐錦江今晚帶埋兒子徐菲，同顏卓靈一齊做頒獎嘉賓。徐、顏完全係大纜都扯唔埋。余迪偉問佢哋知唔知今晚頒咩獎？徐錦江即擰轉頭問顏：「知唔知頒咩獎？」顏一呆，遲咗幾秒先識答：「知。」又話：「其實我哋私下夾咗一夾。」顏卓靈又話感謝金像獎，將兩個來自不同星球嘅人拉埋一齊：「我會驚佢識唔識我，對我咩印象。」徐錦江即派定心丸：「放心，我睇晒你啲戲。」顏卓靈即大讚徐錦江好nice！
1840：「古惑仔」鄭伊健、錢嘉樂、謝天華、林曉峰同埋陳小春今晚做頒獎禮嘉賓，佢哋行紅地氈時好有氣勢，伊健話﹕「我哋冇分大細。」問到對今晚有乜期待？身兼導演嘅錢嘉樂代表發言話﹕「我估，今晚一啲喜歡嘅人攞獎，其實個個攞都高興，係表揚去年努力嘅人，今年黑黑地嘅人旺旺地，但唔係塊面黑呀。」
1843：余香凝今晚以金像獎女神look行紅毯，呢件衫身形好突出，原來係用硬膠纖維做嘅，手袋就係菲林盒，仲寫住「已走光」，而佢條裙就圍咗好多菲林。余香凝話好多人都問可唔可以摸下佢件衫，佢話唔可以，因為一摸就有好多指紋。
1848：王晶率領《追龍》團隊一齊行紅地氈，包括王晶愛將胡然、徐冬冬、伍允龍等，王晶話﹕「冇乜特別感受，拍戲有人認可就唔錯。」導演關智耀就話﹕「開心，《追龍》有咁多提名。」而伍允就話覺得好榮幸。
1849：廖子妤反串着西裝，上屆角逐新人同女配，當時着到靚一靚，今年做頒獎嘉賓，唔知下年有冇得行，所以今年搞下新意思。
1850：鄧月平向來都好性感，但今日就好密實，見唔到事業線，佢話今年主題係青春常駐，唔係性感常駐，佢仲反問記者：「唔好睇咩？」講到突出，佢話自己都唔夠廖子妤同男友着情侶西裝突出。佢話今次戴首飾Tiffany，好趁造型，原本試戴時首飾過千萬，因為好大壓力，所以就揀番啲啱造型就算。
1851：《29+1》獲7項提名，包括新晉導演、最佳編劇、最佳女主角等。彭秀慧、欣宜同娜姐行紅地毯，娜姐大露背大deep v，彭秀慧著透視，騷首弄姿，非常飄逸，惟獨腳傷康復中嘅欣宜著平底鞋現身。彭秀慧自言到依家心情仍然輕鬆，未識緊張。「最緊要係唔好kick，唔好整到條裙，同埋對腳保持乾爽，因為紅地毯好濕。」爭影后嘅娜姐都話盡量心情輕鬆，enjoy嘅心態，「依家仲未識緊張。」爭女配嘅欣宜就話：「我未識緊張，但我好開心，頭先喺後台嗰陣仲成功集郵！」
1900：鄭中基撐住拐杖同太太余思敏一齊到場，行地毯影相嗰陣先拎開，改由太太慢慢扶住，不過佢心情仍然好好，全程笑容滿面。講到心情，中基話一啲都唔緊張，仲笑言自己係古天樂嘅團隊，今晚嚟幫佢打氣，老婆余思敏話自己好緊張，希望佢行慢啲，小心啲。
1908：男配角姜皓文喺紅毯受訪，佢話嘗試平常心，但真係唔得，越忐忑越好玩。司儀話要叫佢黑仔哥，姜皓文就話：「都係黑仔，呢幾年好運，遇到好多好人。最近幾年有好多新導演，我都學到好多嘢。」
1915：憑《藍天白雲》獲提名「最佳女配角」嘅寶珮如話信心唔大，佢話﹕「覺得攞咗獎喇，由開始至今，條路好好，覺得攞咗一百分。」司儀卓韻芝話喺電影見到寶珮如嘅另一面，寶珮如笑得好開心﹕「多謝，傷殘啲，樣好老嘛。」
1920：Pauline姐喺電影圈做咗好多年茶水阿姐，佢獲金像獎頒發「專業精神獎」，問到點泡一杯好茶，佢話﹕「就係要用心去泡。」問到心情？佢話﹕「好緊張，雖然好早知，但都好緊張，好開心，多謝身邊呢位媺姐，係佢帶我入行。」
1921：憑《空手道》入圍女主角嘅Stephy鄧麗欣，今晚以超性感開胸裝示人，紅地毯司儀卓韻之同余迪偉笑言唔可以俾佢自己拎咪，因為會遮住晒。阿之問Stephy：「你郁唔郁得？」Stephy答：「我件衫郁得，個人唔郁得。」佢又話依家心情異常平靜，「我前日出post話心情好緊張，之後好多人都話我知佢哋都好緊張，我見咁多人咁緊張，我嘅心情反而變番平常，好期待發生。」
之前曾表示諗過唔出席金像獎嘅杜汶澤，憑《空手道》入圍爭逐新晉導演，今晚佢都有現身行紅地毯，太太田蕊妮亦陪著你走。之前阿澤話過45歲人先獲新晉導演提名係一件好核突嘅事，問佢係咪好不屑？「只係覺得自己年紀大，過咗45歲就冇資格，因為自己咁老，掛住個『新』字，都醜。」阿田就話好支持《空手道》團隊，特別係嚟支持Stephy。
1922：問到娜姐怕唔怕走光，佢話已經好save，黐咗好多貼紙，已經盡咗力性感，佢話今日儘量挺直腰，係人生最直，坐車着鞋唔可以彎低條腰。而佢件衫改過幾次，噚日改埋最後一次，都有刻意食少咗。問到個胸有冇減咗？娜姐話：「好彩size啱啱好，其實已經最安全。」佢透露今日戴嘅戒指都3卡，連埋頸鏈都2千萬。
1930：成龍同趙薇結伴現身紅地氈，趙薇一身紅裙登場，佢話心情唔緊張，因為自己只係嚟做頒獎嘉賓。而成龍就話自己差唔多每一年都會出席金像獎頒獎典禮，佢話﹕「覺得越做越好，越做越有規模。」
對於今年大會主題係青春常駐，成龍話﹕「的確需要新血，無論樂壇、影壇都需要新血取代我哋，應該將呢啲交俾新一代去做。(有乜說話勉勵一下新一代？)想做就做，Do it,your dream will come true.」。
1945：華仔着白禮服、黑西褲到場。今年感受有啲深，好耐無嚟，上年受傷。見到好多熟悉嘅朋友，大家都有問候我身體點。嚟緊係咪有新片拍，「未拍，即將拍，或者好似成龍咁做另一個打星。」
|
鍾意就快D Share啦！
|
|
|
