林雅詩早前趁住囝囝復活節假期就一齊飛去杜拜玩六日。
藝人林雅詩（Grace）早前趁住囝囝復活節假期，帶埋囝囝以及媽咪飛去杜拜玩六日，更大讚當地食物質素不錯，她說：「小朋友未去過，畀佢見識吓，咁佢都幾鍾意，因為有個以車為主題嘅樂園，佢好喜歡。」估唔到Grace同囝囝一樣鍾意刺激嘅嘢，兩母子仲係個沙漠上「飛車」，她說：「其實唔係我揸，只係我哋坐喺架四驅入面，個司機揸得好快，個感覺好似就嚟飛落沙咁！」
面對當地高達三十幾度高溫，Grace都帶備唔少背心同熱褲去，但點知統統都唔着得要包到實，囝囝見到Grace着成咁反而最開心：「當地衣着真係好嚴格，唔好露肉，所以當地領導都會check我哋啲衫合唔合格，我好多衫帶去都着唔到，要喺當地買過！（囝囝見到你包到咁唔慣？）佢反而開心，因為佢話我咁着成咁最安全，令佢安心，佢份人好保守！平時同佢游水佢都要求我着潛水衣，真係畀佢激死！」
貪玩嘅Grace仲化身百厭媽媽，幫囝囝男扮女裝，她說：「因為我囝囝皮膚白似女仔，咁啱我哋又要包到實，所以我特登用粉紅嘅巾包住佢，點知好多人都以為佢係女仔，證明我係成功咗。」Grace又笑言因為每日都係風沙中度過，所以每次返到酒店落妝都會抹好多沙塵出嚟。
來源 source: http://hk.on.cc
|
鍾意就快D Share啦！
|
|
|
