王浩信近日被爆出跟老婆陳自瑤（YoYo）離婚，有指兩人已分居。YoYo昨在傳出婚變後首度現身活動，她否認離婚，但手上卻沒戴婚戒，事後解釋沒有戴婚戒習慣。YoYo又強調未有趕老公出門口，不過拒用「恩愛」形容夫妻關係，只尷尬稱大家是「老夫老妻」。
現年36歲的陳自瑤和34歲的視帝老公王浩信結婚七年，男方一直緋聞不絕，最近更傳出YoYo近日主動提出離婚，人夫王浩信連日避談，YoYo昨午現身馬鞍山出席活動，傳婚變後首次公開亮相的她更親自解畫。
穿上波點裙的YoYo約下午2時出現，雖然笑容依然，但明顯消瘦不少、眼袋大大，臉上塗上厚粉遮掩倦容。YoYo一口氣回答傳媒所有問題，除澄清沒有提出離婚，亦否認離婚：「多謝咁多人關心，首先我覺得好好笑嘅一樣嘢，一啲自己唔知道嘅事情，寫到好似真嘅一樣，大家嘅想像力真係好豐富。」她再以三點澄清：「首先，冇提出過離婚；第二，我冇趕老公出門口；第三，我小朋友依然同我哋住一齊。」
樓上樓下
至於兩人是否分居？YoYo堅定地說：「冇。可能係因為佢有個office，佢𠵱家除咗拍戲工作外，仲有一啲生意，當然喺屋企唔方便，所以搵咗個地方做office，可能咁樣令到大家有揣測。」但她就承認office是樓上樓下。對於有報道稱YoYo已搵律師辦理離婚手續？YoYo反問：「邊度聽番嚟？連我自己都唔知道，呢幾日新聞唔係事實。」她又謂：「點解會咁樣寫呢，講到我好似潑婦咁，趕老公出街。」有指YoYo找堪輿家李居明指點迷津，她解釋只是一齊做風水節目：「都係會講事業、家庭婚姻，基本上乜嘢人都會問，唔係大件事。」至於李居明稱YoYo返港後仍有繼續請教，她就否認並指當中可能有誤會。
王浩信上月以逾3,000萬購入清水灣近2,000呎單位送給王媽媽，有傳王浩信瞞妻買樓，物業亦沒寫YoYo名字，離婚不用分身家。YoYo昨鄭重澄清：「絕對冇，我係知道，我想話畀大家知，作為子女送禮物畀父母係應該嘅事。佢（王浩信）係應承我，但係未必係𠵱家，我好多謝佢送咁厚禮畀我，我係好開心，相信佢應承咗我係一定會做，只不過今次係作為仔女，首先要孝順咗父母先，我覺得係好應該嘅事。」
唔戴婚戒
訪問期間，YoYo再三強調「近日所有報道係失實」，問到兩人是否依舊恩愛，她尷尬道：「都係夫妻……」之後又說：「老夫老妻囉！係呀，老夫老妻。」講到王浩信對上一次做出令她感動的事，已是去年8月為她慶生。至於手上沒戴婚戒，她表示：「因為要拍劇，費事唔見，所以好少戴。」提到她日前在Ig寫道：「最大的放生是放過自己。」YoYo稱是有感而發，並非暗示夫妻關係有變，更預告下周日父親節會一家人度過。
此外，王浩信昨日在YoYo出活動前三小時，在Ig貼出一張陽光普照風景相後留言：「好好感恩你每一天仍然能夠存在，去感受，去活着，去愛，我就感恩今日太陽終於出返嚟。」似是暗示雨過天青。
採訪：卓寶花
攝影：沈健程
|
鍾意就快D Share啦！
|
|
|