連鎖快餐店麥當勞近日推出每日快閃「限時優惠」，例如10蚊9件麥樂雞咁，真係抵食夾大件，故每日都吸引唔少顧客大排長龍捧場，不過疑因為每天優惠供應數量有限，引發爭議。好似昨日周二(21日)推出嘅「10蚊兩個漢堡飽」，有位躁底哥帶著年幼女兒下午去到麥當勞光顧時，懷疑職員回應指優惠漢堡飽已賣完，他情緒失控下竟然發爛渣大鬧餐廳，大罵店員兼粗口橫飛。除咗嚇親在場食客，連自己個囡囡都睇到呆咗，真係陰公！
話說老麥尋日嘅優惠，係10蚊兩個漢堡飽，根據網上熱傳的片段，可能呢位阿哥心諗住10蚊食餐飯，點知下畫去到某間麥當勞時，店員卻話賣晒，即係冇咗優惠。當時呢位估計約30嘅阿哥，用一條俗稱「狗帶」嘅防走失帶扣住年約3歲嘅小妹妹，喺老麥櫃枱顯得得非常「燥底」，「你話全日都有(優惠)，依家都未夠(下午)3點….點解一個有，兩個冇？大家都係漢堡包！」
片中隱約聽到店員細聲安安撫「優惠完咗喇！」，但躁底哥不滿，若然優惠已完結，理應貼出通告通知顧客。身邊嘅食客全部企喺度食花生，而佢個囡囡企喺隔離仲係幾淡定，好似見慣大場面，不過從囡囡嘅眼神好似都想叫爸爸冷靜啲。嘈咗幾分鐘後，一位後生仔想買嘢食，好心提醒躁底哥「讓一讓」，點知呢個時候，佢竟然爆seed，一手推個後生仔埋櫃位「你買先丫！」對方不甘示弱「你點教女呀？」「關你x事咩？你唔好搞x到我個女呀！」
店員見愈吵愈烈，都忍唔住叫呢位躁底叔「冷靜啲！」最終，呢位阿叔買咗包細薯條，仲好似突然醒返起帶住個女咁，抱起佢「呵番」！妹妹由此至終一粒聲都冇出過，唔知真係淡定，定係嚇親呢？
此短片一出，引來網民熱烈討論，若單就「麥當勞10蚊特價飽一早就賣完」這一點，其實網民意見分歧，有人覺得優惠講明數量有限，冇得投訴，但亦有唔少人撐躁底哥未必錯，因若麥當勞講明有這個優惠，冇理由未到夜晚就話賣晒啲特價漢堡飽，做法不太妥當。
不過躁底哥帶住囡囡仲粗口橫飛鬧店員，幾乎所有網民都一致譴責，認為是教壞細路。大家都紛紛留言，「食唔到會死咩？」、「個小朋友有呢啲阿爸真可憐」、「個小朋友好慘，一定嚇親。」小記正向麥當勞查詢，惟暫時未有回應。
你敢爆，我敢獎！ 立即WhatsApp《蘋果》24小時爆相爆片熱線或致電：63836568
|
鍾意就快D Share啦！
|
|
|
