好Sweet呢！
新婚的鄭嘉穎及陳凱琳（Grace）首度夫妻檔出席品牌活動，以黑白配造型的兩人現身時突然落傾盆大雨，拍照時嘉穎負責擔遮，Grace就攬住對方，非常甜蜜。受訪前，嘉穎吩咐助手先替Grace抹乾身上雨水，更話自己唔緊要，盡顯愛妻之情。
畀老公100分
提到首次夫妻檔工作，Grace表示很開心，嘉穎則認為貴精不貴多。問到是否滿意酬勞？Grace說：「OK嘅。（當家用畀你？）一齊用嘅。」講到結婚時嘉穎說過把所有錢給老婆，他就笑指記者多事，而提到「我太太」三字時，兩人更一齊打冷震，他說：「佢唔明咩叫當家，意思係我負責畀錢。我太太好知慳識儉，我好放心畀數佢睇，佢好精打細算，冇得頂！」問到Grace是否給老公100分？她笑言：「100分，我想畀多過滿分。」嘉穎即笑說要謙虛點。
Grace又透露前一晚是婚後首次為老公下廚：「我蒸水蛋，但起晒泡，我好失望，但佢都有食晒。」嘉穎指她不是經常煮食，笑說：「如果我唔鼓勵佢，我以後冇得食！要從錯誤中學習嘅，佢咁叻，下次實煮得好好。」
生B睇天父
說到度蜜月，嘉穎表示度期中，但拒絕公布地點，又指BB是上天的禮物：「幾時有就幾時有啦。（胡杏兒話你鍾意女多啲？）我仔女都鍾意，如果我第日生仔，佢睇到咁講會唔開心，要公平啲，不過想BB似媽咪。」Grace即甜笑說：「似佢都好。（你生一仔一女？）冇得咁計，睇天父決定。（佢仔女都鍾意你好放心？）係呀，冇壓力。」
對於有報道指二人為住近女家而搬至何文田，嘉穎澄清說：「嗰度係我其中一個投資，係個細單位，租咗畀人，我唔喺嗰度住，我亦唔會講我哋住邊。」
來源 source: http://hk.on.cc
|
鍾意就快D Share啦！
|
|
|
