呢輪中港台三地男女觀眾狂煲《延禧攻略》，仲有內地調查話大專至碩士程度嘅觀眾都有七成，套劇唔單止好睇在班女人點出計仔你爭我奪，仲講埋「女人唔易做」呢個道理！其中一句網民狂Loop嘅對白，直情講出女人嘅心聲：「皇上是既希望我們賢良淑德，又要美貌出眾，又要儉樸持家，又要有勇往直前的勇氣，他這要的是女人，還是神人哪。」要數多功能嘅神人老婆，我Nuts哥真係要推介陳浩民老婆蔣麗莎！
早排蔣麗莎擺烏龍，個女升小一搞錯變小三，唔少網民借題發揮講到去中港矛盾同中港婚姻，咪以為佢懵盛盛，實質佢係精算師，御夫有術呀！講生仔，真係一開三，嫁畀大自己16年嘅陳浩民時，正值25歲花樣年華，話晒都係一名索模，但佢甘願做生仔機器，正如網民所講：「嫁給陳浩民，告別衞生巾！」一口氣五年生四個，有仔又有女，為陳家開枝散葉，唔怕降Cup走樣！
乾柴烈火玩剃毛
愈生愈多，咪以為做湊仔黃面婆，一定會有小三乘虛而入，蔣麗莎定過抬油！負責吸金撲水嘅陳浩民，都講過淨係仔女一年學費都要30萬以上，未計每個月十皮嘢租豪宅同其他燈油火蠟，條數咁甘，你話佢形象幾花弗都好， 事實佢真係一命救全家，為跑數養家日做夜做，腳都軟仲邊有咁多力水孔雀開屏？有都留畀老婆
佢話過點解做咗「多仔公」，因為小別勝新婚，正因為成日同太太分隔兩地，一見面就乾柴烈火，零舍肉緊激情，之後做咩？唔使畫出腸嘛？兩公婆有幾恩愛？淨係講嗰張陳浩民跪地為大肚妻「剪草」剃毛嘅相，真係勝過千言萬語，連同樣身為「多仔公」嘅陳豪都忍唔住當場反晒白眼話：「唔好嘞啩！」就算陳浩民返到屋企家嘈屋閉，四個小朋友嘈到環迴立體聲，蔣麗莎話兩公婆都好似笠咗玻璃罩咁乜都聽唔到，照樣打情罵俏玩煙韌，仲會玩「後攻」，突然從後攬住老公又錫又抱！
「麗莎抗洪」一打十
全職湊仔嘅蔣麗莎，唔會乜都假手於工人，朝早七點做到凌晨一點，全方位照顧四個仔女，一人分飾奶媽、廚師、水電工、司機、補習老師、心理輔導、遊戲導師，又親自煮三餐、接送返學、教功課、玩遊戲講古仔等等。佢反對送仔女去補習班，情願自己教，一教四個小朋友一齊聽，互相影響學得特別快，而佢教仔都有一套，唔會物質至上乜都縱，重視品格多過學業，亦都反對用手機同iPad湊仔，唔怪得個大女做咗品學兼優科科A嘅「學霸」！古有大禹治水，今有「麗莎抗洪」，舊年颱風「天鴿」襲港，搞到屋企水浸兼玻璃門隨時吹甩，佢二話不說Call管理員夾手夾腳搞掂，完全唔使山長水又遠嘅老公擔心！
最令唔少師奶佩服嘅，就係陳浩民7年前爆出強吻陳嘉桓單新聞，但蔣麗莎不離不棄，仲大住個肚同老公一齊公開道歉，真係少啲器量同大方都做唔到！佢平時開口埋口都讚老公顧家愛妻，天上有地下無，唔怪得陳浩民成日話自己行大運，因為娶咗個內外兼備嘅好老婆！仲講緊女子無才便是德？Out女人已經唔係出得廳堂、入得廚房、上得大床咁簡單。女人多功能，無論小男人、大男人都一樣鍾意，只要個女人強得嚟又識得小鳥依人， 最後留番個Credit畀個男人， 唔好走出嚟猛數條衰佬點廢，仲要加句：「你好叻呀！」一定掂過碌蔗！
|
鍾意就快D Share啦！
|
|
|
