現年28歲嘅前新聞主播黃麗幗（Ruby）被唔少網民封為女神，佢前年離開無綫轉投海通國際做投資策略副總裁。樣子甜美嘅佢喺大前年年底做咗人妻，但原來佢結咗婚年幾，去年年中已經離婚。佢身邊朋友就講離婚原因係「性格不合」、「因了解而分開」而和平分手。
知情人士就爆料：「覺得佢婚後唔開心，好少見佢同老公一齊出嚟，覺得佢好孤伶伶，分開原因主要係生活上嘅嘢好多唔夾，住埋一齊相處唔到。」
仍是朋友
回復單身嘅Ruby就為工作忙碌，不時喺社交網分享工作點滴，上星期佢就喺Ig貼咗張企喺沙灘上嘅相留言：「人生與幸福從來都不需要向別人交代。」馮仁昭搵過Ruby，佢就直認已離婚，問佢係咪因為同前夫相處出現問題而分開？佢話：「Sorry，真係唔想講太多，都唔想影響到佢，我哋仲係朋友，仲有聯絡。」問到係咪已經有追求者，Ruby話：「都有朋友話介紹男仔畀我識，順其自然啦，因為我𠵱家再讀書，希望快啲考CFA（特許金融分析師），攞埋分析師牌。」
撰文：馮仁昭
|
鍾意就快D Share啦！
|
|
|
