英國大嘅陳智燊，做過醫院管理工作，不過嫌工作性質悶，因而回流香港，06年加入TVB嘅藝員訓練班，入行12年，累積咗唔少支持者。「我喺公司累積嘅觀眾緣其實都唔少，我見到而家好多小朋友，甚至唔同年紀嘅，阿爸阿媽，或者廿零歲嘅、auntie uncle都有睇TVB，我覺得都好感恩，好開心大家都支持我、支持TVB。」今年6月，Jason離開TVB外闖，自己管理自己，一直安於現狀，究竟係咩原因令佢有咁嘅決定？「我覺得有個家庭之後令自己積極咗好多，喺我結婚後都係倍數咁成長，個人成熟咗、積極咗，諗好多唔同方向，想拍唔同嘅嘢，想拍唔同嘅節目，綜藝、劇集，無論係香港或者新加坡、馬來西亞都想做，尤其而家有咗小朋友之後，當然都會擔心，擔心未來唔知會點樣，但都唔理咁多，老婆、囝囝俾我好大勇氣，我要做好啲，要賺多啲，要照顧屋企。」
入行12年，頭6年都係安排做吓主持人、拍劇做吓閒角，直到近幾年，Jason開始被安排做男一、男二，啱啱被重用，佢就選擇離開，係咪可惜咗啲呢？「我有諗過，其實唔會有一個最適合嘅時機去離開，我成日都會攞呢個比喻，其實等同當年我離開英國，返嚟香港嘅時候，我覺得喺而家呢個歲數，而家嘅經驗，其實點都係而家做，好過五年後做，五年後家庭可能再穩定啲，所有嘢都定晒，可能五年後未必有勇氣去跳出嚟，所以唔會有一個最好嘅時機。但係我覺得喺呢個時候，膽粗粗鼓起勇氣就去做啦。」Sarah對Jason嘅影響，一定係最大。「Sarah工作認真其實俾我好大鼓勵，有時相對比起佢，我咁樣講其實都唔誇張，其實我係比佢懶嘅，我覺得佢嘅認真，對自己做司儀、主持，如果我做到佢嘅 當然我未致於懶到佢嘅一半，但係我學佢認真多少少嘅話，效果、成績其實已經會好好多。」做咗咁多年，有冇啲咩遺憾？「我覺得可能有少少遺憾就係喺TVB中段嘅時間，因為啲嘢嚟得太快，當然唔係埋怨，只係自己無時間去消化，點樣可以做得好啲，我覺得有時啲嘢係需要反省，嗰時點解 就算做得唔差，但係唔夠好，我知道自己犯嘅錯誤喺邊度，當然而家有得反省，有得由而家開始，所有嘢都專注、用心去做，令到自己有勇氣去試新嘢，走出嚟。舉個例，四、五年前做得比合格好少少，又未致於覺得自己做得差嘅，就會keep住喺嗰個環境，當係行緊二、三波嘅，其實從來都唔會諗住需要俾多啲力，加速去做好啲，所以嗰樣嘢我覺得有少少唔開心嘅，但係又未致於令到而家做唔到嘢，或者有好大嘅遺憾，因為始終識得反省，識得自我檢討係一件幾重要嘅事。」
採訪：肥A
攝錄：黃志明
場地提供：Hunny Bee Education Centre 小巨蜂教育中心
立即下載Apps，隨時隨地睇盡時政專題、深度偵查、娛樂熱話！
按此連結：http://bit.ly/next28app
來源 source: http://nextplus.nextmedia.com
|
鍾意就快D Share啦！
|
|
|
