洪卓立同女友湯怡拍拖11年，今年31歲嘅佢，有冇諗過幾時結婚呢？「結婚又無諗喎，唔係無諗嘅，兩個人都唔急囉，曾經有結婚嘅念頭，好老實講點會無吖，頭幾年已經想，但係大病，就無咗呢個諗法。到而家，就算佢出嚟做訪問都有講，反而唔想咁快，大家一齊咁耐，一齊住又日日見，其實同結咗婚無乜分別，我哋又唔係好介意一張紙嘅儀式，我諗大家都會話已經拍拖十一年，仲唔俾對方一個名份，我哋嘅世界又無急於去做呢件事，都多謝大家關心嘅，但係我哋未急囉。」有冇咩情趣可以透露吓呢？「所謂嘅情趣，有時就係喺一啲得意嘢上面，或者兩個人生活上，譬如我送啲嘢俾你，唔通我兜口兜面話送咩俾你咩，咁就唔係叫送嘢啦，咁叫買嘢俾佢啦，類似呢啲囉，你叫我一時三刻我又講唔到，即係一啲驚喜，當然唔會講出口。」
新歌《獻醜》係講有關三角戀，男女朋友喺遇到第三者嘅時候，會有乜嘢選擇或者反應，咁如果洪卓立自己，佢又會點做呢？「老實講做訪問之前，我真係無諗過如果係我會點樣處理，跟住最近做呢首歌嘅訪問，好多朋友問起，我應該會抵唔住頸，兜口兜面講嘅，因為我要所有嘢都好清晰嘅，做嘢又好，屋企人又好，另一半都好，我都要好清晰嘅，我唔鍾意估嚟估去，所以應該會選擇激烈地處理呢件事。」洪卓立同湯怡相處咗11年，有冇咩相處之道可以教吓大家呢？「我平時都會㗎，我會覺得如果兩個人嘅世界都要 除非一啲情趣，如果唔係，生活上嘅一啲問題又好，工作上嘅問題又好，如果要估嚟估去其實好嘥時間，若然估錯就更麻煩，所以我都係選擇正面講。」而家就等我哋聽吓佢首新歌《獻醜》
採訪：肥A
攝錄：蕭敬漁
場地提供：小時光School Cafe
髮型：Terry Yeung @ Corner
化妝：木子維納
服裝提供：WTDAF
立即下載Apps，隨時隨地睇盡時政專題、深度偵查、娛樂熱話！
按此連結：http://bit.ly/next28app
來源 source: http://nextplus.nextmedia.com
|
鍾意就快D Share啦！
|
|
|