現年39歲的才女卓韻芝，昨日無懼超強颱風山竹來襲如期出嫁，新郎是現年34歲、從事電影美術的「閃電俠」梁子賢。一對新人昨晚於中環外國記者會舉行婚禮，並由阿芝婆婆擔任證婚人，星級好友鄭秀文、蔡卓妍及梁詠琪等則擔任姊妹團。
| | |
向俞琤敬茶
新娘阿芝昨早紅色裙褂與新郎向阿芝婆婆跪地斟茶，自從阿芝母親離世後，兩婆孫相依為命，感情深厚，新人斟茶時，婆婆全程笑不攏嘴，婚後阿芝亦將與婆婆同住。阿芝伯樂俞琤亦有接受一對新人敬茶，「嫁女」的俞琤亦笑到見牙唔見眼，非常開心。
其實阿芝上周一已低調擺中式婚宴，宴請至親，女方親友更由加拿大及挪威坐長途機返港見證。當日阿芝穿裙褂出嫁，並按傳統俗禮過大禮及接新娘，新郎及兄弟團殺到時，婆婆讓阿芝在房中等候，不過後來與孫女婿傾偈，竟忘記叫孫女阿芝出場，要阿姨提醒，十分搞笑。
一對新人昨晚大概8時，戴上簡約婚戒接受傳媒訪問，記者起哄叫兩人錫錫時，新郎梁子賢顯得非常害羞，只是借位錫阿芝臉頰。阿芝表示︰「多謝大家打風都嚟，我噚晚有留意風向，仲上網睇，山竹又名『夫妻果』，相信個風都會畀我同朋友聚會先，今日賓客有近200人。」提到婚禮主題，她說︰「我老公……我咁大個女都係第一次咁樣叫人，我老公設計個帖係綠色，因為love is green，綠色係和平、環保同舒服，我哋成個場用咗好多花同植物。」
婆婆練簽名
雖然台上經驗豐富，但阿芝坦言緊張︰「我剛才上到台即刻喊，個腦一片空白，老公都好緊張，佢平時份人好低調。我記得多謝咗婆婆同俞琤，因為婆婆係證婚人，我發現佢之前仲苦練簽名。」談到Sammi笑她鬆散，阿芝說︰「佢哋笑自己係佛系同鬆散系姊妹，其實我哋係緊緻系姊妹。」對於造人，她說要做好手頭工作才有時間度蜜月。
採訪︰陳杰、盧妹
攝影：沈健程
|
鍾意就快D Share啦！
|
|
|