【艷星風光背後】落難時做過麥當勞大家樂 鄭艷麗: 清潔阿嬸我都做 想了解足本版內容請按網址：https://bit.ly/2QDDjkC
艷星這條路，一直也不易走。
90年代艷星鄭艷麗，曾拍多套三級片，《慈禧秘密生活》、《二奶村之殺夫》和《滅門慘案II借種》等。此外，她又拍過露點寫真。豁出去了，但可星運還是平平無奇。其後，她索性跑到台灣發展，更成為富商黃任中契女。
她的前半生，總是和情色扯上關係。
千禧年後，她鮮有露面，14年初，被本刊拍到在麥當勞工作。這次，她接受本刊訪問，細說過去的高低起跌。
「我其實並非只揾麥當勞工作，我咩都願意做，大廈清潔阿嬸，我都有填表申請職位，但實在太多人記得我名字，唔敢聘用我，以為我喺度玩。」46歲的鄭艷麗（Constance）憶述當年途經一間麥當勞，被招聘廣告所吸引，「返夜更多十蚊，因為我白天愛睡眠，起身返工會好辛苦，返通宵好啱我。」面試時要填表，回答有關應對客人細節，「跟我面試寫字樓職位完全唔同，我真係識得填。」經理著她回家等消息，她擔心不獲取錄，終日在家中呆看電話，苦等幾天無果，更反被母親嘲諷「你睇下，就連麥當勞都唔請你」最終成功獲取錄用。
「我每晚要負責掃地、拖地，因為我有潔癖，我真係會抹晒窿窿罅罅的地方，移開桌椅掃地，年青人都唔及我咁細心。」如是者，勤力表現終獲賞識，她察覺開始不對路，為何每晚均由她一人負責拖地，「面試時明明話經理、所有人都會分擔，無理由蝦我一個新人，我覺得好委屈，喊左好多次，後來同事話因為我清潔得太乾淨，所以先叫我做。」
當年麥當勞時薪$32，後來轉到大家樂任收銀員，時薪較高達$45，她說也很不錯。「以前嘅我好迷失，做事失去方向，我好想話俾幫過我嘅朋友知，我鄭艷麗會識醒，要做過正正當當的人。」
風光不在，由跑馬地搬到秀茂萍公屋，現居於親友家中，落差變化大，反映明星背後的實況，「跑馬地月租兩萬幾，我又無能力繼續住，每月燒銀紙，我唔識理財，無儲蓄，但我都係人，最重要識起番身。」
回望過去，她無悔背上脫星之名，拍攝三級電影及露點寫真，「我又年輕，身材唔差，可能部份人眼中係好嚴重事情，但其實好多人到外國沙灘游水，也是赤裸上身，視乎別人看法，我覺得無所謂。」她說喜歡娛樂圈工作，但倔強和率直性格卻成為障礙，說話不懂修飾，容易得罪別人。
星運停滯不前，她轉戰台灣發展，成為富豪黃任中契女，鄭母更獲邀到當地為黃任中做廚師，負責炮製廣東菜。萬千寵愛在一身，她直認每逢新年獲契爺送贈最大的紅封包：「眾多女生中，我總被安排坐佢身邊，他名氣比我大，我知佢目的係為我好，想我見報率高，提升工作量。」黃任中喜歡女人化妝，Constance憶述：「佢喜歡女人悉心打扮，特別係穿著旗袍，可突顯女生優美身段，他約我去街，當日我無化妝，雖然只係逛超市，佢突然又話唔想去，唔知發生咩事，後來先知，原來佢唔鐘意我連唇膏都無搽。」
她說，不在乎外界指她被包養，更張開雙手反問「如果我被包養，依家一定好富有及擁有好多物業，唔使住親友屋企」。
黃任中於04年病逝，她頓失經濟支柱，要獨自返國內登台唱歌賺快錢，「客人在台下猜枚，曾有人將啤酒杯拋擲上台，都唔係聽我唱歌，我只好左閃右避扮無事。第一首都未唱完，就遞上一大杯威士忌，幾個男人要我飲晒，你飲唔飲？！點知唱完第二首歌又再來，總之過程就係不停飲酒，到最後我唱《花花宇宙》，已無法唱落去，走晒音，企唔穩，對方就話已在樓上預訂房間，我話唔洗，即刻call的士走人。」她如今憶起仍猶有餘悸。
12年，她獲富商林建明提携，轉做寫字樓文職，面試時連填申請表也不懂。「問你一分鐘打字速度、學歷程度、能操何種國家語言，我真係無法填寫任何一項，只能填寫自己名字和身份證，再簽名遞交，覺得好失禮，雖然我知一定會請我，但都好緊張和有壓力，人地有俾出糧俾我，所以平時會揾清潔工作來做，周圍抹下東西。」
現時中越兩地飛， 越南華橋Constance近月在越南經營咖啡店，及獲股壇奇人陳志雄安排下在越南做植物飲品代理，希望能藉當地的人脈關係開拓事業新發展。
採訪：艾馬
攝影：王晴
立即下載Apps，隨時隨地睇盡時政專題、深度偵查、娛樂熱話！
按此連結：http://bit.ly/next28app
來源 source: http://nextplus.nextmedia.com
|
鍾意就快D Share啦！
|
|
|
