日光日白找錢黨喺上環搵食，認真夠膽！下晝2點幾飯市繁忙時段，有個光頭男人走入上環水坑口街一間越式餐廳，佢趁唔少客人埋單收銀員忙緊收錢，就博大霧落單叫個咖喱牛腩飯外賣。當時佢攞住張銀紙喺收銀員旁邊掩掩揚揚，但好快手就收番埋張銀紙，之後佢就話畀咗500蚊，叫個收銀員找番錢畀佢。好彩個收銀女職員醒目，話睇番閉路電視囉，結果嚇到騙徒走夾唔抖。
從閉路電視片段所見，個懷疑找錢黨騙徒係一個著住背心、戴住黑超嘅中年男人。當時佢先喺餐廳門外打量咗一陣，之後就走入餐廳直接走到收銀櫃枱隔離，趁其他食客埋單走人，佢就聲東擊西同收銀員落單叫外賣，仲詐假意右手攞住張銀紙向收銀員揚咗一揚，之後即刻右手交左手，將張銀紙袋番落左邊褲袋。當收銀員收完其他客人錢招呼佢嘅時候，佢就扮已經畀錢，叫個收銀員找番錢畀佢。
收銀員胡小姐話喎，自己忙緊收錢，但個騙徒冇排隊走埋嚟，落單叫外賣，仲不斷問「有冇得跟湯？有冇嘢飲送㗎？」企圖混水摸魚、擾亂視線。個騙徒係講流利廣東話，佢言之鑿鑿叫找錢嗰一刻，胡小姐話自己一時間都懷疑係咪收過佢錢，但諗深一層確實係冇，咁自己梗係企硬啦。所以當時佢冇俾對方大到，即刻打畀經理，仲向個騙徒講話可以睇返閉路電視「巡邏影片」。
果然個騙徒聽到咁，疑心虛知道事敗，胡小姐透露對方藉口話泊咗車喺隔離街，驚抄牌轉頭再返嚟，結果就一走了之。胡小姐話好彩冇中計，如果唔係個牛腩飯同嘢飲58蚊，找咗錢餐廳就白白損失400幾蚊嘞，事後老闆仲讚佢做得好。餐廳負責人詹先生事後冇報警，佢話半年前土瓜灣分店都出現過找錢黨，日後會加倍小心，並提醒行家多加留意，遇到同樣情況，可以翻睇閉路電視。
你敢爆，我敢獎！ 立即WhatsApp《蘋果》24小時爆相爆片熱線或致電：63836568
| 光頭男聲東擊西同收銀員落單叫外賣，仲詐假意右手攞住張銀紙向收銀員揚咗一揚，之後即刻右手交左手，將張銀紙袋番落左邊褲袋。（詹先生提供） | | |
| |
|
鍾意就快D Share啦！
|
|
|