被韓流打殘嘅日本演藝界，靠木村拓哉囡囡木村光希光復，早排佢孖住阿媽工藤靜香殺到香港，Nice爆賣萌Sell親善，接地氣吔撻食雞蛋仔，雞蛋仔打人牙骹軟，不過論吸Like度同話題性，就完全畀《全民造星》嘅姜濤直接K.O.！
歷史不會忘記，決賽當日成為「大奇迹日」，成個Facebook都係姜濤、姜濤同姜濤！平日喺網上狂呻同奶奶大戰，同老公死過嘅媽媽、同埋鍾意晒名牌放P圖，數爆男友嘅公主港女，呢日都放下戾氣同仇恨，齊聲猛話要同「姜B」拉票，男友、老公、阿仔都要幫手投票！大佬，立法會補選都冇咁肉緊如此團結有愛，哈利波特都唔明，只可以講句：「係愛呀，哈利」！
喊樣都靚仔過人？
被指係翻版彭于晏（真係似咩？）嘅姜濤，係打扮舉止浸晒泡菜味嘅偽韓MK仔。傻笑、嘟嘴、伸脷、賣萌，玩吓憂鬱樣又派韓式心心，畫眼線搽吓粉，無疑佢個樣同唱歌算OK，利申仲係處男冇拍過拖添，被踢爆拍過拖扮A0時，佢就話只係同個女仔拖手拖咗一條街咁大把喎！最令我Nuts哥驚訝，係佢成日爆喊兼被喪插遲到，但大批「姜糖」網民就話慘慘豬，心都赤埋，仲讚佢喊得靚仔又Cute，更離譜嘅仲有：「姜Dee Dee，姐姐呵番！你唔鍾意姐姐我唔緊要，我仲有個十幾歲嘅女」、「話姜B你遲到，係因為你太出色，畀人葡萄針對，啲人心理唔平衡呀！」吓？你試吓返工遲到同上司講：「你葡萄我呀？」吖笨！姐姐好餓啊！姜濤今次比賽出征，恍如甘露遇上百年旱災饑荒，喚醒無數「久旱姐姐」嘅少女心，激發全港女性久違甚至失落嘅母性，不能自拔，個個當正佢係仔或細佬爭住呵、爭住錫，血濃於水呀！
忘記肥樣抬起頭
爆紅關鍵係古仔夠真實，再引證肥仔肥妹都係潛力股，冇得輸！佢係同學口中讀書唔掂、又肥又蠢嘅200磅「死肥仔」，因為暗戀對象識咗第二個，變相失戀而天崩地裂，佢唔想做一條溝唔到女嘅可憐蟲，終於洗心「瘦」面，進化成今日150磅嘅小鮮肉！呢段脂肪血淚史又Pure又True，佢話參賽係想克服自卑感，講到咁，秒吸不同年齡組別「姐姐」嘅同情心，佢話受盡打擊冇自信抬唔起頭，啲「姐姐」就踴躍捐輸式支持，幫佢起番個頭！唔理佢嘅過去有幾分傷心幾分「脂」/「癡」，對於一個19歲嘅仔嚟講，喺舞台上尋自信搵自我，睇落好似好老土，其實算係一個幾純真勵志嘅故事！
呢個年代，凡事公審要求真，因為乜都可以係假，但凡手袋、雞蛋、學歷、身份甚至個樣同身材都可以造假時，當有人自揭肚皮畀晒你睇，呢一點真，反而令人動容。如今選秀比賽不同往日，參賽者要全方位展示最真實最醜陋嘅一面，觀眾投入真情實感睇住佢大，親自「育成」，而唔係明星工廠倒模式打造偶像，得個樣先有人Buy ！講到尾，青春真好，如果姜濤係49歲嘅大叔，啲姐姐又喺邊呢？
----------------------------
東網巨星開咗ig喇，大家快啲follow
https://bit.ly/2JjSVcr
|
鍾意就快D Share啦！
|
|
|